جاڭاوزەندە مۇمكىندىگى شەكتەۋلى سپورتشىلارعا ارنالعان ورتالىق اشىلدى

جاربول كەنت ۇلى 24 ءساۋ. 2024 20:00 1649

بۇگىن جاڭاوزەندە «قازمۇنايگاز» ۇك اق ەنشىلەس كاسىپورنى «وزەنمۇنايگاز» اق قاراجاتىنا سالىنعان مۇمكىندىگى شەكتەۋلى جاندارعا ارنالعان «العا» سپورت كلۋبىنىڭ عيماراتى اشىلدى.


عيمارات زاماناۋي جابدىقتارمەن، مۇمكىندىگى شەكتەۋلى جانە تىرەك-قيمىل اپپاراتى زاقىمدالعان جاندارعا ارنالعان ترەناجەرلارمەن جابدىقتالعان، ليفتىلەر مەن پاندۋستار ورناتىلعان. بۇل – كومپانيانىڭ دەمەۋشىلىگىمەن سالىنعان جانە پايدالانۋعا بەرىلگەن قالاداعى ەكىنشى سپورت كەشەنى.


سونداي-اق كومپانيا سپورت كلۋبتىڭ قاجەتتىلىگىنە جانە سپورتشىلاردىڭ ىڭعايلى ءجۇرىپ-تۇرۋىنا ميكرواۆتوبۋس تارتۋ ەتتى.


«العا» سپورت كلۋبىندا بۇگىندە 100-گە جۋىق سپورتشى شۇعىلدانادى. ولاردىڭ قاتارىندا رەسپۋبليكالىق جانە حالىقارالىق جارىستاردىڭ بىرنەشە دۇركىن چەمپيوندارى بار. سونىمەن قاتار، كلۋب سپورتشىلارى 2024 جىلى پاريجدە (فرانسيا) وتەتىن پاراليمپيادا ويىندارىنا جولداما الدى.


سپورت كلۋبتىڭ اشىلۋىنا قمگ باسقارما ءتوراعاسى ماعزۇم مىرزاعالييەۆ، ماڭعىستاۋ وبلىسىنىڭ اكىمى نۇرلان نوعايەۆ، جاڭاوزەن قالاسىنىڭ اكىمى جانسەيىت قايناربايەۆ، «وزەنمۇنايگاز» اق باس ديرەكتورى نۇرداۋلەت كيلىباي، ب ا ق جانە مادەنيەت سالاسىنىڭ وكىلدەرى ارنايى كەلدى.


«ءبىز وسىنداي كەرەمەت سپورتشىلارعا قولداۋ كورسەتىپ، ولاردىڭ سپورتتاعى جەتىستىكتەرىنە ۇلەس قوسقانىمىزدى ماقتان تۇتامىز. ءبىز جەڭىستىڭ قۋانىشىن سەزىنەتىن جانە باسقالاردى ءوزىنىڭ ۇلگىسى مەن تاباندىلىعىمەن شابىتتاندىراتىن مۇمكىندىك جاساۋعا قۋانىشتىمىز. سايىپ كەلگەندە، سپورت – بۇل ءوزىڭدى فيزيكالىق تۇرعىدا جەڭۋ عانا ەمەس، مىقتى رۋح پەن ەرىك-جىگەردىڭ كورسەتكىشى»، - دەپ اتاپ ءوتتى م.مىرزاعالييەۆ.


«بۇل كەشەن جاي عانا ورتالىق ەمەس، سونىمەن قاتار، ءبىزدىڭ قوعامداعى ينكليۋزيا مەن تەڭدىكتىڭ ماڭىزدىلىعىن كورسەتەتىن سيمۆولعا يە نىسان. بۇل جەر اركىم ءوز پوتەنسيالىن اشىپ، موتيۆاسيا جانە مۇمكىندىك تابا الاتىن ورىن رەتىندە قىزمەت ەتۋگە ارنالعان.

الداعى پاراليمپيادا ويىندارى ءبىزدىڭ سپورتشىلارىمىز ءۇشىن ءوزىنىڭ كەرەمەت تالانتىن عانا ەمەس، سونىمەن قاتار مىزعىماس رۋحاني كۇشىن كورسەتۋگە مۇمكىندىك بەرەدى. ءبىزدىڭ سپورتشىلار تەك جاقسى ناتيجە كورسەتىپ قانا قويماي، تاباندىلىق پەن رۋحاني كۇشتىڭ ۇلگىسىن كورسەتە وتىرىپ، وزگەلەردى شابىتتاندىراتىنىنا سەنىمدىمىن»، - دەدى نۇرلان نوعايەۆ.


«العا» سپورت كلۋبىنىڭ نەگىزىن 1993 جىلى امانتۇرلى قىلىشبايەۆ قالاعان. كلۋبتىڭ قازىرگى جەتەكشىسى – قۇرالبەك سەيىتوۆ. سپورت كلۋبتا وتىرىپ وينايتىن ۆولەيبول، بوچچا، توعىزقۇمالاق، قول كۇرەسى، فۋتبول، جەڭىل اتلەتيكا، تەننيس، ءجۇزۋ جانە وزگە دە 17 ۇيىرمە بار.


سونىمەن قاتار، قمگ «تازا قازاقستان» جالپىۇلتتىق ەكولوگيالىق اكسياسىن قولداۋ ماقساتىندا جاڭاوزەندە مىڭ ءتۇپ اعاش وتىرعىزادى. ناۋقاننىڭ باستاماسى رەتىندە ءىس-شارا قاتىسۋشىلارى سپورت كەشەنىنىڭ اۋماعىندا اعاش وتىرعىزدى.


ۇسىنىلعان
سوڭعى جاڭالىقتار