Qaladaǵy iri kompanıalardyń biri – «ÓzenMunaıGaz».
Ózen munaı gaz óndirý kásipkerligi sonaý 1964 jyldyń 15 shildesinde qurylǵan.
Qazirgi tańda «ÓzenMunaıGaz» aksıonerlik qoǵamyna qarasty 16 qurylymdyq óndiristik basqarma bar. Onyń tórteýi munaı gaz óndirý basqarmasy, al ózge basqarmalar óndiriske qosymsha servıstik qyzmet kórsetedi.
Epıdemıologıalyq jaǵdaıǵa baılanysty eńbek ujymynyń qurylym jetekshileri ǵana bilikti epıdemıolog, ınfeksıonıst dárigerlermen kezdesti.
Qyzmetkerler mamandarǵa kókeıinde júrgen suraqtaryn qoıyp, keńes surady. Kompanıa baspasóz qyzmetiniń málimetinshe, ujymdaǵy kásipodaq jetekshileri men qurylym basshylarynyń basym bóligi vaksına alǵan.
Mysaly, «ÓzenMunaıGaz» AQ-da 25 jyl eńbek etip júrgen bas esepshisi Anar Ospanova «Spýtnık V» vaksınasynyń ekinshi komponentin alǵanyn aıtty.
Vaksınanyń ekeýin de aldym. Eshqandaı janama áser bolǵan joq. Din-aman júrmin. Men aınalamdaǵy adamdardyń qaýipsizdigi úshin vaksına saldyrdym. Sebebi men jumysta ártúrli jastaǵy adamdarmen jumys isteımin. Sondyqtan qorshaǵan ortaǵa zıan tıgizgim kelmedi. Árbir adam óziniń jáne otbasynyń qaýipsizdigi úshin vaksına alady dep oılaımyn, - dedi Ospanova.
Al kompanıanyń taǵy bir qyzmetkeri tańdaý reseılik jáne qazaqstandyq vaksına arasynda bolǵandyqtan, otandyq ónimdi tańdaǵanyn aıtty.
Jalpy kompanıada vaksına alǵandar sany myńǵa jýyqtaǵan. Mamandar qazir qyzmetkerlerdiń vaksına alý qarqyny kúsheıip kele jatqanyn aıtty.
Sonymen qatar epıdemıologtar 2200 adam qyzmet etetin «Byrgylau» JSHS ujymymen de kezdesti.
Mekeme dırektory Dúısenbaı Taýshanovtyń aıtýynsha, 154 adam vaksına alǵan.
Bizdiń kompanıada 29 qurylym aýtsorsıng formatynda jumys isteıdi. Sonyń barlyǵyn qosqanda 2200 adam. Keńsede jumys isteıtin qyzmetkerlerdiń 154-i vaksına alǵan. Men jaqynda «Spýtnık V» vaksınasyn alamyn. Osyndaı mamandarmen kezdesip, suraq-jaýap sesıasyn ótkizý qyzmetkerlerge jaqsy áser etip jatyr. Búgin olar barlyq qyzyqtyrǵan suraqtaryna jaýap aldy, - dedi Taýshanov.
Bul mekemeden keıin epıdemıolog mamandar men jergilikti bılik ókilderi Munaıshy mádenıet úıinde «ÓzenInvest» MKK ujymy men bilim salasynyń qyzmetkerlerimen jolyqty.
Qalaǵan qala turǵyndary da jıynǵa kirip qatysty.
Sharada medısına ǵylymdarynyń kandıdaty, epıdemıolog Aınagúl Qýatbaeva kez kelgen vaksına syrttan organızmge túsetin aqýyz ekenin aıtty.
İndetke tosqaýyldy tek vaksına ǵana qoıa alady. Byltyrǵy aqpan aıynan bastap buqaralyq oryndarǵa barmańyz, bata jasamańyz, 10-15 adamnan jınalatyn jerge barmańyz dep eskertip jatyrmyz. Sebebi Túrkistan oblysyndaǵy qarıa Jambyl oblysy, Kókshetaý qalasyna, Qaraǵandyǵa baryp, 180 adamǵa indet juqtyrǵan. Sonyń jeteýi indetten kóz jumdy. Sondyqtan vaksına alǵan kúnniń ózinde de sanıtarlyq talaptar týraly umytpaǵan jón, - dedi Qýatbaeva.
Sonymen qatar aqparattyq-nasıhat tobynyń músheleri 1995 jyldan beri jumys istep kele jatqan «Mańǵystaý munaı gaz» AQ-nyń enshiles kompanıasy «Mańǵystaý energo munaı» JSHS mekemesiniń qyzmetkerlerine de vaksınasıa týraly túsindirý jumystaryn júrgizdi.
Jıynǵa qatysýshylar tarapynan «Vaksına alýdyń tıimdiligi men áseri qandaı?, Alǵashqy jáne ekinshi komponenttiń arasy nege bólingen?, Jańa shtamdarǵa qarsy vaksınany qaıta salý kerek pe?, Vaksınany kimderge alýǵa bolmaıdy?» degen suraqtar kóp qoıyldy.
Aqparattyq top múshesi Asfendıarov atyndaǵy Qazaq ulttyq medısınalyq ýnıversıtetiniń juqpaly jáne tropıkalyq aýrýlar kafedrasynyń dosenti Aınur Sadyqova halyqtyń suraǵyna barynsha jaýap berýge tyrysqanyn aıtty.
Halyqtyń suraǵy óte kóp. Biz olardyń barlyǵyna jaýap berýge tyrystyq. Tipti, keı ujym ekinshi kezdesýge shaqyryp, suraqtaryna jaýap alǵysy kelip jatqan jaıy bar. Vaksına alýǵa eshkim qarsy emes. «Vaksına alǵannan keıin aýyryp qalamyn ba?, Qandaı áser bolýy múmkin?» degen suraqtar da boldy. Biz túsindirý jumystaryn odan ári jalǵastyrýǵa daıynbyz, - dedi Aınur Sadyqova.
Osyǵan deıin bilikti mamandar «Mańǵystaý atom energetıkalyq kombınaty» JSHS ujymyna vaksınasıa boıynsha túsindirý jumystaryn júrgizgen edi.
Aıta keteıik, Mańǵystaý oblysy qazir «qyzyl» aımaqta tur. Jańaózen qalasynda vaksınanyń alǵashqy komponentin 10 424 adam, ekinshi komponentin 3 933 adam alǵan.
