Mańǵystaý oblysyndaǵy "Burǵylaý" munai servistik kompaniiasynyń jumysshylary ereýilin toqtatyp, 6 qazan kúni jumysqa shyqty. Ótken aptadan beri ereýildetken jańaózendik munaishylar jalaqyny kóterýin jáne kásipodaqty qýdalaýdy doǵarýyn talap etip keldi.
Oblys ákimi Alik Aidarbaevtyń aitýynsha, sársenbi kúni jumysshylar belsendileriniń "Ózmenmunaigaz" ben "Burǵylaý" kásiporyny basshylarymen kezdesýiniń nátijesinde qosymsha kelisim-shart jasalyp, servistik kompaniia jyl aiaǵyna deiin alty milliard teńgege (18 mln dollar) taǵy 34 burǵy alatyn boldy.
"Bul qarajat jyl aiaǵyna deiin jetedi. Jumysshylar talap etken biryńǵai tólem júiesi "QazMunaiGaz" kompaniiasynyń ishki qujaty sanalady. Jumys kólemine qarai tarifter de kóteriledi. Budan soń "Burǵylaý" óziniń tólem júiesin qaita eseptei alady", - dedi ákim.
Buǵan qosa, Aidarbaev jumysshylar tańdaǵan kásipodaq jumysqa kirisetinin aitty. Ákimniń aitýynsha, kásipodaq tóraǵasy Sádýaqas Bekqalievke qatysty sot belgilegen shartty jazany jumys berýshi beibit kelisim aiasynda retteitin boldy.
30 qyrkúiekte "Burǵylaý" kompaniiasynyń júzdegen jumysshysy jumysqa shyqpai qoidy. Olar biryńǵai eńbek júiesin engizý arqyly jalaqyny kóterýin, buǵan qosa 2014-2016 jyldar aralyǵynda atqarylǵan qosymsha jumys aqysyn tólep berýin, kásipodaq tóraǵasyn qýdalaýdy doǵarýyn talap etti.
