Qazaqstanda pasportty onlain qaita rásimdeý qyzmeti biyl iske qosylýy múmkin. Bul týraly Jasandy intellekt jáne tsifrlyq damý birinshi vitse-ministri Rostislav Koniashkin málimdedi, dep habarlaidy dalanews.kz.
Onyń aitýynsha, naqty merzim ázirge belgisiz. Barlyǵy jeke kýálikti onlain qaita rásimdeý boiynsha pilottyq jobanyń nátijesine bailanysty bolmaq.
«Biyl iske qosylmaidy dep aita almaimyn. Eger júieniń daiyn ekenine kóz jetkizsek, qyzmetti osy jyldyń ózinde iske qosýymyz múmkin», – dedi vitse-ministr.
Qazir vedomstvo jeke kýálikti onlain jańartý qyzmetin synaq rejiminde júrgizip jatyr. Ázirge bul múmkindik qujattyń qoldanylý merzimi aiaqtalǵan jaǵdaida ǵana qoljetimdi. Koniashkinniń sózinshe, qyzmet tolyq jetildirilgennen keiin ony basqa qujattarǵa da engizý josparlanyp otyr. Onyń ishinde pasportty onlain qaita rásimdeý jáne jeke kýálikti ózge de jaǵdailarda jańartý múmkindigi qarastyrylýda. Bolashaqta bul qyzmetti qujat joǵalǵan kezde, tegi ózgergen jaǵdaida jáne basqa da sebepter boiynsha paidalaný múmkindigi zerttelip jatyr.
Vitse-ministr memlekettik qyzmetterdi tsifrlandyrý jumystary jalǵasyp jatqanyn atap ótti. Qazir halyqqa qyzmet kórsetý ortalyqtaryna túsetin ótinishterdiń shamamen 79 paiyzyn quraityn eń suranysqa ie 10 qyzmetti onlain formatqa kóshirý jumystary aiaqtalýǵa jaqyn.
Sonymen qatar shetel azamattaryna jeke sáikestendirý nómirin (JSN) berý qyzmetin de onlain formatqa kóshirý máselesi qarastyrylyp jatyr.
Budan bólek, taǵy 12 memlekettik qyzmet tolyqtai tsifrlyq formatqa aýystyrylmaq. Mundai jaǵdaida azamattar qyzmetti HQKO qyzmetkeri arqyly emes, ózine-ózi qyzmet kórsetý aimaǵynda mamandardyń keńesimen rásimdei alady.
