Fermerler bir kúnde 130 tonnadan astam alma satty. Bul Almatyda Qala kúni ótetin jyl saiyn dástúrli eń iri Alma Fest festivaliniń sońǵy 15 jyldaǵy rekordy. Jármeńkege 50 baý-baqsha sharýashylyǵy qatysyp, ańyzǵa ainalǵan aport almasyn, kollektsiialyq suryptar men taý bókterinde ósirilgen ósirilgen sirek býdandy jemisterdi usyndy, dep habarlaidy Dalanews.kz
Festivalge 120 myńnan astam qonaq jinaldy. Olarǵa arnap úsh úlken sahna men úsh shaǵyn alańda kontsertter, teatrlandyrylǵan qoiylymdar jáne sheberlik dáristeri ótkizildi.
Festivaldiń qolóner aimaǵyna basa nazar aýdaryldy. Munda 58 qolóner sheberi dástúrli zergerlik zattardy, toqymadan, aǵashtan, bylǵary men metalldan jasaǵan buiymdaryn kórsetti. Art-aimaqta 30-dan asa sýretshi týyndysyn salyp, beineleý óneriniń qazirgi kezdegi damýyn pash etti.
Uiymdastyrýshylar qonaqtarǵa arnalǵan tamaqtaný aimaqtaryn, sanitarlyq beketterdi qamtamasyz etti. Alma Fest 2025 mádeniet pen agrarlyq salany ushtastyratyn, al qolónershiler men sýretshilerge ónerin keń aýditoriiaǵa kórsetýge múmkindik beretin iri qalalyq jármeńke mártebesin taǵy da dáleldedi.
