Sarapshy Aibar Oljaidyń pikirinshe, Qazaqstan ekonomikasy qurylymdyq ózgeristerdiń jańa kezeńine ótti, dep habarlaidy Dalanews.kz.
Onyń aitýynsha, biyl birinshi toqsanda Teńizdegi apat pen KQK júiesine jasalǵan shabýyldar saldarynan munai óndirý 19,8%-ǵa, gaz óndirý 15,1%-ǵa qysqarǵan. Sonyń áserinen taý-ken sektory 11,4%-ǵa tómendegen. Dástúrli kózqaras boiynsha mundai jaǵdaida ekonomika da quldyraýy kerek edi. Alaida kerisinshe osy kezeńde ishki jalpy ónim 3% ósim kórsetken.
Aibar Oljai muny ekonomikanyń jańa baǵytqa bet burýymen bailanysty dep túsindirdi. Qazir ósim munai salasyna emes, óńdeý ónerkásibi, kólik, qurylys, saýda jáne qyzmet kórsetý baǵyttaryna bailanysty bolyp otyr. Bul ishki sektorlar kúsheigenin jáne ekonomikanyń syrtqy qysymdarǵa tózimdi bola bastaǵanyn kórsetedi.
Sarapshy uzaqmerzimdi úrdiske nazar aýdaryp, keiingi on jylda munai sektorynyń úlesi aitarlyqtai azaiǵanyn atap ótti. 2010 jyly bul kórsetkish 16,5% bolsa, 2024 jyly 8,1%-ǵa deiin túsken. Al óńdeý ónerkásibi 12,7%-ǵa jetip, ekinshi jyl qatarynan taý-ken sektorynan alǵa shyqty. Onyń pikirinshe, bul elde jańa ekonomikalyq model qalyptasyp jatqanyn bildiredi.
Aibar Oljai ekinshi toqsanda ósim qarqyny kúsheietinin aitady. Sebebi birinshi toqsandaǵy 3% ósimge endi munai faktory qosylady. Munai óndirý qalpyna kelip, CPC Blend pen KEBCO baǵasy da ósken.
Sóz aiaǵynda sarapshy "2026 jyly ekonomikalyq ósim 5%-dan tómen bolmaidy" degen boljam jasap otyr.
