Qairat Áskerbekuly Dosaev – Taraz qalasynyń burynǵy ákimi. 2019 jyly kúzde mektep ájethanasynda oqýshy qyz zorlanǵan soń qyzmetten ketken.
Sol ýaqytta shýly oqiǵany prezident óz baqylaýyna alyp, oblys ákimine Taraz qalasynyń ákimi qyzmetten ketsin degen tapsyrma bergen.
Sol jyly jeltoqsan aiynda Qairat Dosaev Jambyl oblystyq eńbek inspektsiiasy basqarmasynyń basshysy boldy. Arada jarty jyl ótken soń Jambyl oblystyq tabiǵi resýrstar jáne tabiǵat paidalanýdy retteý basqarmasynyń basshysy bolyp taǵaiyndalǵan.
Artynsha muny bilip qoiǵan prezident Berdibek Saparbaevqa sógis jariialap, Dosaevty qyzmetten ketirýdi talap etken.
Qairat Dosaev – Almaty ákimi Erbolat Dosaevtyń týǵan baýyry. Ómirimniń 20 jylyn memlekettik qyzmetke arnadym degen ol óziniń Facebook paraqshasy arqyly Qasym-Jomart Toqaevqa hat joldady.
Hat orys tilinde. Onda óziniń qyzmet jolyn, adal qyzmet etkenin, prezidentke áldekimder jalǵan aqparat jetkizgenin jazypty. Ózin ne sebepti eki ret jazalaǵanyn da áli kúnge túsinbei júr eken.
– Qazir meni bolǵan oqiǵalardan keiin eshqandai basshy jumysqa qabyldamaidy. Jańa Qazaqstandy qurýǵa atsalysqym keledi. Meniń kúsh-qýatym toly, halyq úshin qyzmet etýge qulshynyp turmyn. Memlekettik qyzmettegi barlyq ýaqytta aryma daq túspedi, ar-uiatymmen áreket ettim, –dep jazdy Qairat Dosaev.
Dosaevtyń jazýy boiynsha, ol memlekettik qyzmetke tek prezident Toqaev aralasqan soń ǵana orala almaq. Sońǵy úmiti memleket basshysynda ekenin aitypty.
