قايرات اسكەربەك ۇلى دوسايەۆ – تاراز قالاسىنىڭ بۇرىنعى اكىمى. 2019 جىلى كۇزدە مەكتەپ اجەتحاناسىندا وقۋشى قىز زورلانعان سوڭ قىزمەتتەن كەتكەن.
سول ۋاقىتتا شۋلى وقيعانى پرەزيدەنت ءوز باقىلاۋىنا الىپ، وبلىس اكىمىنە تاراز قالاسىنىڭ اكىمى قىزمەتتەن كەتسىن دەگەن تاپسىرما بەرگەن.
سول جىلى جەلتوقسان ايىندا قايرات دوسايەۆ جامبىل وبلىستىق ەڭبەك ينسپەكسياسى باسقارماسىنىڭ باسشىسى بولدى. ارادا جارتى جىل وتكەن سوڭ جامبىل وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى بولىپ تاعايىندالعان.
ارتىنشا مۇنى ءبىلىپ قويعان پرەزيدەنت بەردىبەك ساپاربايەۆقا سوگىس جاريالاپ، دوسايەۆتى قىزمەتتەن كەتىرۋدى تالاپ ەتكەن.
قايرات دوسايەۆ – الماتى اكىمى ەربولات دوسايەۆتىڭ تۋعان باۋىرى. ءومىرىمنىڭ 20 جىلىن مەملەكەتتىك قىزمەتكە ارنادىم دەگەن ول ءوزىنىڭ Facebook پاراقشاسى ارقىلى قاسىم-جومارت توقايەۆقا حات جولدادى.
حات ورىس تىلىندە. وندا ءوزىنىڭ قىزمەت جولىن، ادال قىزمەت ەتكەنىن، پرەزيدەنتكە الدەكىمدەر جالعان اقپارات جەتكىزگەنىن جازىپتى. ءوزىن نە سەبەپتى ەكى رەت جازالاعانىن دا ءالى كۇنگە تۇسىنبەي ءجۇر ەكەن.
– ءقازىر مەنى بولعان وقيعالاردان كەيىن ەشقانداي باسشى جۇمىسقا قابىلدامايدى. جاڭا قازاقستاندى قۇرۋعا اتسالىسقىم كەلەدى. مەنىڭ كۇش-قۋاتىم تولى، حالىق ءۇشىن قىزمەت ەتۋگە قۇلشىنىپ تۇرمىن. مەملەكەتتىك قىزمەتتەگى بارلىق ۋاقىتتا ارىما داق تۇسپەدى، ار-ۇياتىممەن ارەكەت ەتتىم، –دەپ جازدى قايرات دوسايەۆ.
دوسايەۆتىڭ جازۋى بويىنشا، ول مەملەكەتتىك قىزمەتكە تەك پرەزيدەنت توقايەۆ ارالاسقان سوڭ عانا ورالا الماق. سوڭعى ءۇمىتى مەملەكەت باسشىسىندا ەكەنىن ايتىپتى.
