Nazarbaev bar resýrsyn taýsyp, kerek qylmaǵan Ertisbaevtyń Toqaevqa qatysty aitqan árbir sózi halyqty Toqaevtan alystata túsetindei... (Ertisbaevtyń osyndai «magiiasy» bar ǵoi).
Basqany qaidam óz basym suhbatty bastan aiaq tyńdaǵanymda osyndai sezimdi bastan keshtim.
Qazaq qoǵamynda Nazarbaevtyń aqtaýshysy retinde ábden tanylǵan Ertisbaevtyń Toqaevqa advokad bolýyn halyq qabyldamaidy.
Jańa Qazaqstandy qurý kezinde osyǵan deiin bilikte bolǵan shendilerdiń bárimen at-quiryǵyn úzisýdiń qajeti joq ekenin túsinemiz. Óitkeni, biliktiń ishinde de Nazarbaevtyń shekten shyqqan áreketine talaǵy tars aiyrylardai bolyp, áreń shydap júrgen aq jaǵalylar boldy. Ony moiyndaýymyz kerek.
Biraq Jańa Qazaqstandy qurý kezinde at qosshy retinde de tartýǵa bolmaityn shendilerdiń bar ekenin de esten shyǵarmaǵan abzal.
Qazaq qoǵamy úshin qundylyǵyn joǵaltqan sondai shendiniń biri – Ermuhamed Ertisbaev.
Bulai degenimiz úshin bizge Erekeń renjimei-aq qoimas. Óziniń qazaqy qoǵamdyq-saiasi ómirde jaǵymsyz adamǵa ainalǵanyn bizden emes, ózinen kórsin!
Jańa Qazaqstandy qurý barysynda qoǵamdyq-saiasi ómirde arylýdy qajet etetin dúnieler bar. Sonyń biri hám biregeii – jaǵympazdyq.
Ertisbaevty aty atalǵanda kópshilik kirpidei jiyryla qalady. Nege? Óitkeni ol osyǵan deiin qoǵamdyq ortada Nazarbav rejimin aqtaýshy retinde tanyldy.
Elimizde Nazarbaev biliginiń ideologiialyq turǵydan uzaqqa sozylýyna yqpal etken 10 shendi bolsa, sonyń bel ortasynda Ertisbaev turary haq.
Sondyqtan Erekeńdi Jańa Qazaqstannyń irgesin qalap, ýyǵyn qadaýǵa múlde aralastyrýǵa bolmaidy.
Kezinde Nazarbaevtyń ózi kerek qylmai zeinetke jibergen Ertisbaevty halyq Toqaevtyń janynan múlde kórgisi kelmeidi.
Muny Toqaevtyń ainalasynda júrgen adamdar túsinýi kerek.
Óitkeni, Erekeń Nazarbaev kezinde ádiletsizdikten japa shekken Toqtar Áýbákirov pen Jaqsylyq Qulekeevpen salystyrýǵa kelmeitin «chelovek» qoi.
Sondyqtan Jańa Qazaqstandy qurýǵa bel býǵan Toqaevtyń Ertisbaevtan aýlaq júrgeni abzal.
Ertisbaev kúni keshe ǵana Baitasovqa bergen suhbatynan keiin ashýymyz kelip, osy jazbany jazýǵa májbúr boldyq.
Erekeń kezekten tys Prezident sailaýy kezinde Toqaevtyń kandidatýrsyn usyný úshin qurylǵan Halyqtyq koalitsiiany (ishinde «Amanat», «Aq jol», Qazaqstan halyqtyq partiiasy men ondaǵan qoǵamdyq uiymdar bar) «tarqatpaý kerek» dep kósilip áńgime aitty. Onyń oiynsha, atalǵan koalitsiia «strategiialyq máselelermen» ainalysý... úshin kerek eken.
Ertisbaevtyń osy áńgimesinen Nazarbaev rejimin ańsap otyrǵanyn ańǵardyq.
Eger Prezident Toqaev qolǵa alǵan saiasi reformalar iske assa ol jerde Ertisbaevtyń «qyzmetine» degen muqtajdyq týyndamaýy kerek. (Nazarbaev rejimi kezinde Ertisbaevtyń «qyzmeti» ádiletisiz sailaýlardy aqtaý bolaǵanyn bárimiz bilemiz).
Halyqtyq koalitsiiany tarqatpai saqtap qalǵannan ne utamyz? Eshteńede utpaimyz. Bar bolǵany Nazarbaev rejimine qaita qadam basamyz.
Bul – koalitsiianyń taratpasaq, kezinde «Asar», «Azamattyq» partiialardy jáne «Altyn orda» syndy qozǵalystardy jutyp qoiǵan «Nur Otan» siiaqty ebedeisiz bir «dinazovr» dúniege keletini anyq.
Al «dinozavr» partiialardyń alǵashqy saiasi zil-zalalarǵa qarsy tura almai tyrapai asatynyn talai ret kýá boldyq emes pe?
Dál qazir bizdiń qoǵamǵa «dinozavr» partiia emes, Jańa Qazaqstanǵa halyqtyń túri top ókilderiniń muń-muqtajyn jetkizetin kóptegen saiasi uiymdar aýadai qajet.
Ertisbaev kókemiz osylaisha Toqaevqa keńes bergisi kelip otyrǵanyn baiqadyq. (Aqylyn qaltasyna salyp qoisyn!).
Bul endi Toqaevtyń jyl basynan qolǵa alyp jatqan saiasi reformasyn joqqa shyǵaratyn keńes qoi.
Búgin sailaýda jeńiske jetken Memleket basshysy Qasym-Jomart Toqaevty ulyqtaý rásimi ótti.
Búginnen bastap Qasym-Jomart Toqaev barsha qazaq eli moiyndaǵan, zańdy – Prezidenti.
Demek, búginnen bastap Toqaevtyń saiasi reformalaryna múlde úilespeitin áńgime aitqan Ertisbaevtan Toqaev irgesin aýlaq salýy kerek.
Halyq aldaǵy 7 jylda Toqaev bilikti ózgertedi dep senip otyr.
Al Ertisbaev syndy eski bilikke qyzmet etken «chelovekter» bilik Toqaevty ózgertkenin qalaityn siiaqty...
Nurlan JUMAHAN
