Astanada Memlekettik keńesshi Erlan Qarinniń tóraǵalyǵymen Parlamenttik reforma jónindegi jumys tobynyń besinshi otyrysy ótti, dep habarlaidy Dalanews.kz
Jiynda Parlamentarizm institýtynyń direktory Natalia Pan azamattardan, sarapshylardan jáne qoǵam belsendilerinen kelip túsken usynystar jónindegi aralyq aqparatpen bólisti. Byltyr qazan aiynan beri e-Otinish jáne eGov platformalaryndaǵy «Parlamenttik reforma» arnaiy bólimi arqyly halyq arasynan, sarapshylar qaýymdastyǵynan jáne qoǵamdyq birlestikterden 600-ge jýyq usynys jinaqtalǵan. Atap aitqanda, «Baitaq» partiiasy, «Jańarý» sybailas jemqorlyqqa qarsy jalpyulttyq qozǵalysy, Respýblikalyq advokattar alqasy, «Toqtamys» advokattyq qaýymdastyǵy, Halyqaralyq arbitraj jáne mediatsiia palatasy, Parlamentarizmdi damytý qory, Qazaqstandyq tatarlar men bashqurttar kongresi, Ekonomikalyq saiasat institýty, «Azamattyq bastama» bastamashylyq toby jáne basqa da uiymdar óz usynystaryn bildirdi. Buǵan qosa quqyqtanýshy ǵalymdar sarapshylyq usynymdaryn joldap, belsendilik tanytýda.
Sonymen qatar Parlamentarizm institýtynyń direktory azamattar men qoǵamdyq birlestikterden parlamenttik reformadan bólek, konstitýtsiialyq reformaǵa qatysty da bastamalar túsip jatqanyn jetkizdi.
Jumys toby jetekshisiniń orynbasary – Prezidenttiń quqyqtyq máseleler jónindegi kómekshisi Erjan Jienbaev Parlamenttiń Úkimetti, Konstitýtsiialyq Sotty, Joǵary aýditorlyq palatany, Ortalyq sailaý komissiiasyn jáne basqa da memlekettik organdardy jasaqtaýǵa qatysýyn retteitin konstitýtsiialyq rásimderdiń jalpy tásilderi týraly aitty. Bul tásilder Jumys toby músheleri men saiasi partiialardyń usynystary negizinde ázirlengen.
Jumys tobynyń músheleri qatarynan Marat Shibutov, Azat Perýashev, Elnur Beisenbaev, Serik Egizbaev, Magerram Magerramov, Aidarbek Qojanazarov, Marat Bashimov, Nurlan Beknazarov, Indira Áýbákirova, Únzila Shapaq, Alýa Ibraeva, Bórihan Nurmuhamedov, Leila Jaqaeva, Viktor Malinovskii, Erlan Sársembaev, Aidos Sarym, Qarlyǵash Jamanqulova óz ideialary men usynystaryn ortaǵa saldy.
Jiyn sońynda Jumys tobynyń jetekshisi – Memlekettik keńesshi Erlan Qarin konstitýtsiialyq reforma boiynsha túpkilikti tásilderdi ázirleý úshin kelip túsken usynystardyń barlyǵyn jinaqtap, jan-jaqty zerdeleýdi tapsyrdy.
