استانادا مەملەكەتتىك كەڭەسشى ەرلان ءقاريننىڭ توراعالىعىمەن پارلامەنتتىك رەفورما جونىندەگى جۇمىس توبىنىڭ بەسىنشى وتىرىسى ءوتتى، دەپ حابارلايدى Dalanews.kz
جيىندا پارلامەنتاريزم ينستيتۋتىنىڭ ديرەكتورى ناتاليا پان ازاماتتاردان، ساراپشىلاردان جانە قوعام بەلسەندىلەرىنەن كەلىپ تۇسكەن ۇسىنىستار جونىندەگى ارالىق اقپاراتپەن ءبولىستى. بىلتىر قازان ايىنان بەرى e-Otinish جانە eGov پلاتفورمالارىنداعى «پارلامەنتتىك رەفورما» ارنايى ءبولىمى ارقىلى حالىق اراسىنان، ساراپشىلار قاۋىمداستىعىنان جانە قوعامدىق بىرلەستىكتەردەن 600-گە جۋىق ۇسىنىس جيناقتالعان. اتاپ ايتقاندا، «بايتاق» پارتياسى، «جاڭارۋ» سىبايلاس جەمقورلىققا قارسى جالپىۇلتتىق قوزعالىسى، رەسپۋبليكالىق ادۆوكاتتار القاسى، «Toqtamys» ادۆوكاتتىق قاۋىمداستىعى، حالىقارالىق اربيتراج جانە مەدياسيا پالاتاسى، پارلامەنتاريزمدى دامىتۋ قورى، قازاقستاندىق تاتارلار مەن باشقۇرتتار كونگرەسى، ەكونوميكالىق ساياسات ينستيتۋتى، «ازاماتتىق باستاما» باستاماشىلىق توبى جانە باسقا دا ۇيىمدار ءوز ۇسىنىستارىن ءبىلدىردى. بۇعان قوسا قۇقىقتانۋشى عالىمدار ساراپشىلىق ۇسىنىمدارىن جولداپ، بەلسەندىلىك تانىتۋدا.
سونىمەن قاتار پارلامەنتاريزم ينستيتۋتىنىڭ ديرەكتورى ازاماتتار مەن قوعامدىق بىرلەستىكتەردەن پارلامەنتتىك رەفورمادان بولەك، كونستيتۋسيالىق رەفورماعا قاتىستى دا باستامالار ءتۇسىپ جاتقانىن جەتكىزدى.
جۇمىس توبى جەتەكشىسىنىڭ ورىنباسارى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنبايەۆ پارلامەنتتىڭ ۇكىمەتتى، كونستيتۋسيالىق سوتتى، جوعارى اۋديتورلىق پالاتانى، ورتالىق سايلاۋ كوميسسياسىن جانە باسقا دا مەملەكەتتىك ورگانداردى جاساقتاۋعا قاتىسۋىن رەتتەيتىن كونستيتۋسيالىق راسىمدەردىڭ جالپى تاسىلدەرى تۋرالى ايتتى. بۇل تاسىلدەر جۇمىس توبى مۇشەلەرى مەن ساياسي پارتيالاردىڭ ۇسىنىستارى نەگىزىندە ازىرلەنگەن.
جۇمىس توبىنىڭ مۇشەلەرى قاتارىنان مارات شيبۇتوۆ، ازات پەرۋاشيەۆ، ەلنۇر بەيسەنبايەۆ، سەرىك ەگىزبايەۆ، ماگەررام ماگەرراموۆ، ايداربەك قوجانازاروۆ، مارات باشيموۆ، نۇرلان بەكنازاروۆ، ينديرا اۋباكىروۆا، ءۇنزيلا شاپاق، الۋا يبرايەۆا، ءبورىحان نۇرمۇحامەدوۆ، لەيلا جاقايەۆا، ۆيكتور مالينوۆسكيي، ەرلان سارسەمبايەۆ، ايدوس سارىم، قارلىعاش جامانقۇلوۆا ءوز يدەيالارى مەن ۇسىنىستارىن ورتاعا سالدى.
جيىن سوڭىندا جۇمىس توبىنىڭ جەتەكشىسى – مەملەكەتتىك كەڭەسشى ەرلان قارين كونستيتۋسيالىق رەفورما بويىنشا تۇپكىلىكتى تاسىلدەردى ازىرلەۋ ءۇشىن كەلىپ تۇسكەن ۇسىنىستاردىڭ بارلىعىن جيناقتاپ، جان-جاقتى زەردەلەۋدى تاپسىردى.
