Birinshi synypqa qazirdiń ózinde 27 myńǵa jýyq bala qabyldandy. Onyń ishinde 57%-y memlekettik tilde bilim alatyn bolady. Qujat qabyldaý 31 tamyzǵa deiin jalǵasady. Bul týraly Almaty qalasy Bilim basqarmasynyń basshysy Sairan Saifedenov Óńirlik kommýnikatsiialar qyzmetinde ótken baspasóz máslihatynda aitty,- dep habarlaidy Dalanews.kz
Onyń sózinshe, jyl saiyn memlekettik tilde oqýǵa degen suranys artyp keledi. Búginde megapolistegi barlyq oqýshylardyń 51%-y qazaq tilinde bilim alyp jatyr.
«Mysaly, 1990 jyly memlekettik tilde bar-joǵy 11 myń ǵana oqýshy oqyǵan bolsa, biyl olardyń sany 177 myńǵa jaqyndady. Iaǵni bul kórsetkish tabiǵi túrde 16 esege ósti», – dedi Saifedenov.
Spikerdiń aitýynsha, Qazaqstan Respýblikasynyń árbir azamaty balasynyń oqý tilin óz qalaýy boiynsha tańdaýǵa quqyly. Qoldanystaǵy normativtik erejelerge sáikes, mektepter qyzmet kórsetý aimaǵynda turatyn barlyq balalardy qabyldaýǵa mindetti, al jańa bilim berý mekemelerin ashý barysynda oqý tili qoǵamdyq suranysqa qarai anyqtalady.
«Sońǵy 12 jylda Almatyda 24 jańa mektep ashyldy, sonyń 19-y nemese 80%-y – memlekettik tilde bilim beredi. Sonymen qatar, «Keleshek mektepteri» Ulttyq jobasy aiasynda ashylýy josparlanǵan 12 mekteptiń 9-y qazaq tilinde bolady. Munyń bári ata-analardyń suranysyna bailanysty», – dep atap ótti Bilim basqarmasynyń basshysy.
Brifing barysynda aitylǵandai, basty basymdyq – halyqtyń qajettilikterin eskere otyryp, qolaily ári qoljetimdi bilim berý ortasyn qalyptastyrý.
