Úkimet otyrysy barysynda jańa Konstitýtsiia normalaryn júzege asyrý jónindegi sharalar qaraldy. Premer-ministr Oljas Bektenov onyń zamanaýi tarihyndaǵy el taǵdyryn aiqyndaityn eleýli kezeń ekenin atap ótti, dep habarlaidy Dalanews.kz.
«Eń aldymen, barsha qazaqstandyqty tarihymyzdaǵy asa mańyzdy oqiǵa – jalpyhalyqtyq referendýmda jańa Konstitýtsiianyń qabyldanýymen quttyqtaimyn!
Bul – Qazaqstannyń zamanaýi tarihyndaǵy el taǵdyryn aiqyndaityn eleýli kezeń.
Memleket basshysy Qasym-Jomart Kemeluly Toqaevtyń basshylyǵymen jáne qoǵamnyń belsendi qoldaýymen elimizde júrgizilip jatqan aýqymdy ózgerister Qazaqstannyń kez kelgen syn-qaterlerge tótep berýin qamtamasyz etedi», — dep atap ótti Oljas Bektenov.
Premer-ministr jańa Konstitýtsiia saiasi turaqtylyqty nyǵaityp, ekonomikany odan ári jańǵyrtýǵa jol ashatynyna nazar aýdardy.
«Ata zań saiasi turaqtylyqty nyǵaityp, ekonomika men qoǵamnyń barlyq salasyn odan ári jańǵyrtýǵa jol ashady.
Birlik pen ádildik, zań men tártip siiaqty negizgi qundylyqtardy ornyqtyryp, ultymyzdyń uzaq merzimdi damý baǵdaryn aiqyndaidy.
Ol elimizdiń saiasi júiesine halyqtyń tolyqqandy qatysýyna, azamattardyń quqyqtary men bostandyqtarynyń qorǵalýyna, adam kapitalynyń, ǵylym men mádeniettiń, tsifrlyq ortanyń sapaly damýyna, ekologiialyq qaýipsizdiktiń saqtalýyna kepildik beredi», - dep atap ótti Premer-ministr.
