Almatydaǵy №224 mektepte til máselesine qatysty daý shyqty, dep habarlaidy Dalanews.kz.
Daýdyń basy
Bul másele týraly áleýmettik jelide jýrnalist Dias Nuraqyn jazdy. Onyń sózinshe, ata-analar balalary oqityn mekteptiń qazaq tilinde bolýyn surap otyr.
"Almatydaǵy №224 mekteptiń aralas tilde bilim berýin ózimizdiń qazaqtar talap etip otyr eken ǵoi. Al búgin taza qazaqtar jinalyp tek qazaq mektebi bolsyn dep jatyr", - dedi ol.
Bul jait áleýmettik jelide qyzý talqylanyp, qoǵam narazylyǵyn týdyrdy.
Biyl qyrkúiekte 2500 oqýshy ornyna arnalǵan №224 jáne №221 mektepter "Keleshek mektepteri" ulttyq jobasy aiasynda paidalanýǵa berilgen. "Jaily mektep" dep bastaý alǵan joba qazir Oqý-aǵartý ministriniń usynysymen "Keleshek mektepteri" dep atalyp keledi.
Al bul mektepter ashylǵan kezde ministrlik "Qazaqstandaǵy eń úlken eki mektep Almatyda salyndy", - dep súiinshi suraǵan eken. Dese de artynan osyndai daý shyǵyp otyr.
Ministrliktiń ustanymy
Oqý-aǵartý ministrligi jańa mekteptegi daýǵa qatysty Dalanews.kz saýalyna bylai dep jaýap qatty:
"Oqytý tili jergilikti atqarýshy organdardyń sheshimimen belgilenedi. Oǵan sol jerdegi mektep jasyndaǵy balalar sany jáne ata-analardyń suranysy negiz bolady".
Al Almaty qalasy Bilim basqarmasy saýalymyzǵa ázirge jaýap bermedi.
Aita keteiik, bul Almatydaǵy birinshi jaǵdai emes. Biyl qyrkúiekte de dál osyndai daý shyǵyp, belsendiler talabynan keiin Almatydaǵy №215 mektep qazaq tilinde oqytatyn boldy.
