Bıyl 1 qyrkúıekten Ulybrıtanıanyń Lester qalasyndaǵy De Montfort ýnıversıtetiniń fılıaly óz jumysyn bastaıdy.
«Almatyda bıyl taǵy bir halyqaralyq ýnıversıtet jumysyn bastaıdy. Ol Ulybrıtanıanyń Lester qalasyndaǵy De Montfort ýnıversıteti. Álemdik deńgeıde ózindik joǵary orny bar ýnıversıtet.
Qazir Úkimetten lısenzıa aldy. Bıylǵy jospar – 300-deı stýdent qabyldaý. Eger usynys kóp bolsa, bakalavrıatqa 400-deı stýdent qabyldaıdy. Jyl sońyna deıin 90 magıstrant qabyldaý. Bıyl 1 qyrkúıekten oqý jylyn bastaıdy.
Bul ýnıversıtettiń kampýsyn salý úshin Qulja trassanyń oń jaǵynan jer bóldik. Keler jyldyń basynda ýnıversıtettiń qurylysy bastalady», – dedi qala ákimi.
Brıtandyq ýnıversıtettiń fılıaly Qazaqstan Respýblıkasy Úkimetiniń qaýlysymen ashyldy. Qazaqstandyq oqýshylardyń Anglıaǵa barmaı-aq qoljetimdi baǵamen sapaly bilim alýyna múmkindik týady. Ýnıversıtet aımaqtaǵy talantty jastarǵa shákirtaqy da usynady. Sonymen qatar, qala ákimi taǵy eki ýnıversıtpen kelissózder júrgizilgenin aıtty.
– Pandemıa kezinde biz sıfrlandyrýǵa kóp kóńil bóldik. Densaýlyq salasyndaǵy kásiporyndardy bir jerge jınaqtap, farmklaster jasasaq jáne sonyń qasynda sol jerde qyzmet etetin jumysshylardy oqytatyn ýnıversıtet ashsaq degen ıdeıamen Úkimetke shyqtyq. Úkimet bizdi qoldady. Sıfrlyq dúnıeni damytýǵa kelgende, Nazarbaev ýnıversıteti tarapynan usynys boldy. Nazarbaev ýnıversıteti ishinen ashylatyn «Jasandy ıntellekt» mektebin Almatydaǵy erkin aımaqqa ornalastyrsaq degen usynys keldi. Óıtkeni Almatyda osyǵan baılanysty baza tolyq daıyn.
Sıfrlyq salada qyzmet etetin kompanıalardyń 70 paıyzy Almatyda ornalasqan. Barlyq IT kompanıa, negizgi zertteý ortalyǵy da Almatyda ornalasqan. Biz bul usynysty qýana qabyldadyq. Sonymen qatar, Alma ýnıversıteti men Arızona memlekettik ýnıversıteniniń tarapynan Almaty qalasynan qosymsha ýnıversıtet ashýǵa birikken usynys tústi. Álemdik ýnıversıtetterdiń kampýs júıesimen salynatyn, stýdenterdiń sol jerde turyp oqıtyn, muǵalimderi de turatyn ózinshe bir qalashyq, kampýs bolmaq, – dedi Saǵyntaev.
Qalada jańa talapqa, jańa tehnologıaǵa, sıfrlyq tehnologıaǵa, ınovasıaǵa baılanysty úsh birdeı ýnıversıttiń ashylýy qýanyshty jańalyq. Qalanyń ekonomıkalyq qurylymyn ózgertýge jastar da atsalysý kerek.
Olardyń sapaly bilim alýyna halyqaralyq úsh ýnıversıtettiń alar orny erekshe. Sonymen qatar, qala ákimi ǵylymnyń damýyna da múmkindik týatynyn aıtty. Eń aldymen óndiriske paıdaly, qalanyń erkin aımaǵyndaǵy, ındýstrıaldy aımaǵyndaǵy kásiporyndarǵa, jalpy eldegi kásiporyndar óziniń bazasyn kúsheıtý, ekonomıkalyq áleýetin kóterý úshin jańa tehnologıany osy jerdegi zerthanalardan ala alady. Bul qala ekonomıkasyn basqa deńgeıge kóteredi.
