Májilis depýtaty Ermurat Bapi jańa bilik eski Qazaqstanmen qatty kúres júrgizip jatqanyn aitty, - dep habarlaidy Dalanews.kz.
«Materialdyq turǵydan qaraǵanda jańa, eski dep bóletin eshteńesi joq. Bir halyq, bir bilik, bir memleket, bir Qazaqstan. Biraq saiasi sana turǵysynda degradatsiia jasaý durys dep sanaimyn. Sebebi eski júieden qutylý kerek qoi. Sonyń bir shekarasy bolýy kerek. Shekaradan bastap jańa Qazaqstan dep bólip alǵanymyz bolmasa, bári bir Qazaqstan ǵoi. Eskiden qutylmaiynsha eshqashan jańa bolmaidy. Eskiniń ókilderi áli otyr. Qazir Nazarbaevtyń adamdary, ókilderi, áldeqandai oligarhtary ásirese ekonomika, qarjy, energetika salasynda áser etýge yqpal etip otyr, kúshin salyp jatyr. Jańa bilik elge, halyqqa jariia etpei, ún-túnsiz, astyrtyn túrde eski Qazaqstanmen qarqyndy kúresip jatyr. Timýr Qulybaevqa qandai áreketter jasalyp jatqanyn bilemin, biraq ony jariia ete almaimyn», - deidi depýtat «Múmkin emes» youtube-arnasyna bergen suhbatynda.
Bapidiń sózinshe, Nazarbaevtyń tóńireginde júrgen basqa da oligarhtarǵa qatysty biraz sharýalar istelip jatqan kórinedi.
«Meniń oiymsha, onyń bári birtindep jariia bolady. Toqaevtyń byltyr qysta «Biz Qazaqstandy qadam-qadammen ózgertemiz» degen sózi bar ǵoi. Sol «qadam-qadamyna» senýge týra keledi. Basqa úmit joq. Soǵan bailanysty birtindep jariia bolady dep oilaimyn. Sebebi jariia bolmasa qoǵam jańa biliktiń is-áreketine senbeidi. (...) Mysaly Turǵymbaevtyń máselesi. Ony «ei, anany qamańdar» degen joq qoi. Ol astyrtyn júrip kelgen sharýanyń nátijesi. Jalǵasy júrip jatyr», - deidi Ermurat Bapi.
Sonymen qatar, depýtat Qańtar oqiǵasynan keiin ustala bastaǵan adamdar týraly oiyn aitty.
«Samat Ábishtiń soty kúlkili boldy. Bul da qoǵamnyń bilikke senimsizdigin týdyrady. 8 jyl shartty túrde sottaý degen ne? Osynyń bári qoǵamǵa keri áserin tigizedi», - deidi depýtat.
