ءماجىلىس دەپۋتاتى ەرمۇرات باپي جاڭا بيلىك ەسكى قازاقستانمەن قاتتى كۇرەس جۇرگىزىپ جاتقانىن ايتتى، - دەپ حابارلايدى Dalanews.kz.
«ماتەريالدىق تۇرعىدان قاراعاندا جاڭا، ەسكى دەپ بولەتىن ەشتەڭەسى جوق. ءبىر حالىق، ءبىر بيلىك، ءبىر مەملەكەت، ءبىر قازاقستان. ءبىراق ساياسي سانا تۇرعىسىندا دەگراداسيا جاساۋ دۇرىس دەپ سانايمىن. سەبەبى ەسكى جۇيەدەن قۇتىلۋ كەرەك قوي. سونىڭ ءبىر شەكاراسى بولۋى كەرەك. شەكارادان باستاپ جاڭا قازاقستان دەپ ءبولىپ العانىمىز بولماسا، ءبارى ءبىر قازاقستان عوي. ەسكىدەن قۇتىلمايىنشا ەشقاشان جاڭا بولمايدى. ەسكىنىڭ وكىلدەرى ءالى وتىر. ءقازىر نازاربايەۆتىڭ ادامدارى، وكىلدەرى، الدەقانداي وليگارحتارى اسىرەسە ەكونوميكا، قارجى، ەنەرگەتيكا سالاسىندا اسەر ەتۋگە ىقپال ەتىپ وتىر، كۇشىن سالىپ جاتىر. جاڭا بيلىك ەلگە، حالىققا جاريا ەتپەي، ءۇن-تۇنسىز، استىرتىن تۇردە ەسكى قازاقستانمەن قارقىندى كۇرەسىپ جاتىر. تيمۋر قۇلىبايەۆقا قانداي ارەكەتتەر جاسالىپ جاتقانىن بىلەمىن، ءبىراق ونى جاريا ەتە المايمىن»، - دەيدى دەپۋتات «مۇمكىن ەمەس» youtube-ارناسىنا بەرگەن سۇحباتىندا.
ءباپيدىڭ سوزىنشە، نازاربايەۆتىڭ توڭىرەگىندە جۇرگەن باسقا دا وليگارحتارعا قاتىستى ءبىراز شارۋالار ىستەلىپ جاتقان كورىنەدى.
«مەنىڭ ويىمشا، ونىڭ ءبارى بىرتىندەپ جاريا بولادى. توقايەۆتىڭ بىلتىر قىستا «ءبىز قازاقستاندى قادام-قاداممەن وزگەرتەمىز» دەگەن ءسوزى بار عوي. سول «قادام-قادامىنا» سەنۋگە تۋرا كەلەدى. باسقا ءۇمىت جوق. سوعان بايلانىستى بىرتىندەپ جاريا بولادى دەپ ويلايمىن. سەبەبى جاريا بولماسا قوعام جاڭا بيلىكتىڭ ىس-ارەكەتىنە سەنبەيدى. (...) مىسالى تۇرعىمبايەۆتىڭ ماسەلەسى. ونى «ەي، انانى قاماڭدار» دەگەن جوق قوي. ول استىرتىن ءجۇرىپ كەلگەن شارۋانىڭ ناتيجەسى. جالعاسى ءجۇرىپ جاتىر»، - دەيدى ەرمۇرات باپي.
سونىمەن قاتار، دەپۋتات قاڭتار وقيعاسىنان كەيىن ۇستالا باستاعان ادامدار تۋرالى ويىن ايتتى.
«سامات ءابىشتىڭ سوتى كۇلكىلى بولدى. بۇل دا قوعامنىڭ بيلىككە سەنىمسىزدىگىن تۋدىرادى. 8 جىل شارتتى تۇردە سوتتاۋ دەگەن نە؟ وسىنىڭ ءبارى قوعامعا كەرى اسەرىن تيگىزەدى»، - دەيدى دەپۋتات.
