Jańa ári tyń bastamalar nasihattaldy
Bul maqsatty júzege asyrý úshin oblys ákiminiń ókimimen arnaiy aqparattyq túsindirý toby qurylǵan bolatyn. Aqparattyq top qatarynda Qazaqstan Respýblikasy bilim jáne ǵylym ministrligi bilim jáne ǵylym salasyndaǵy baqylaý komiteti Jambyl oblysynyń bilim salasyndaǵy baqylaý departamentiniń basshysy Dámesh Shaihyqyzy Úskimbaeva da boldy. Ol joǵaryda atalǵan mektepte jalpy aýdandaǵy bilim berý mekemeleriniń ustazdary men ózge de qyzmetkerlerine jáne kolledjge jinalǵan jastarǵa elimizde áleýmettik salada júzege asyrylǵaly jatqan tyń bastamalarmen tanystyrdy. Máselen, ol óz sózinde biýdjet salasynda ailyǵy tómen qyzmetkerlerdiń jalaqysy 1 shildeden emes, 1 maýsymnan bastap 30 paiyzǵa kóterilgeli jatqandyǵyn málim etti. Odan bólek, aýdandyq jáne oblystyq deńgeidegi azamattarmen tikelei jumys isteitin atqarýshy organdar qyzmetkerleriniń eńbekaqysyn orta eseppen 25 paiyzǵa kóterý júktelip, osy maqsatta 2019-2021 jyldary qosymsha 980 mlrd teńge bólinetindigin habarlady.
Jiyn barysynda kópbalaly analar men áleýmettik jaǵdaiy tómen otbasylarǵa qandai kómek kórsetiletindigi týraly saýaldar kóp joldandy. Bul suraqtarǵa Dámesh Shaihyqyzy atalǵan azamattardy qoldaý sharalaryn keńeitý baǵytynda Úkimet tarapynan jumystar júrgizilip jatqandyǵyn jetkizdi. Atap aitqanda, ataýly áleýmettik kómek alyp otyrǵan kópbalaly otbasylardyń árbir balasyna beriletin járdemaqy 21 myń teńgege ósetin bolady. Elbasy N.Nazarbaev «Nur Otan» partiiasynyń XVIII sezinde sóilegen sózinde halyq ary-beri shapqylap júrmeýi úshin ataýly áleýmettik kómekke qol jetkizý barynsha jeńil túrde júrgizilýi qajet ekendigin atap ótti. Sondai-aq, kópbalaly otbasylardyń tabysyn esepteý barysynda alyp otyrǵan basqa áleýmettik járdemaqylary sanalmaý qajettigin aitqan bolatyn. Osy boiynsha qazirgi tańda aýdan kóleminde eriktiler toby turǵyndardyń áleýmettik turmysyn anyqtaý boiynsha jumystar júrgizýde.
Dámesh Shaihyqyzy «Jastar jyly» aiasynda oryn alyp jatqan jańashyldyqtardy da atap ótti. Máselen, «Jas kásipker» baǵdarlamasy ázirlenýde.Bul baǵdarlama arqyly «Bastaý biznes» jobasymen jas kásipkerler oqytylyp, olardyń kásippen ainalysýyna tolyq jaǵdai jasalatyn bolady. Osy syndy jańa ári tyń bastamalardy shýlyqtarǵa jan-jaqty túsindirgen D.Úskimbaeva qoiylǵan barlyq suraqqa tolyqqandy jaýaptar qaiyrdy. Atap óterligi, dál osyndai túsindirý jumysy aýdannyń ózge de eldi mekenderinde júrgizildi.
