Jambyl oblysynda alaiaq múgedektigi bar tulǵanyń páterin zańsyz iemdenip alǵany belgili boldy, dep habarlaidy Dalanews.kz.
Jyljymaityn múlik alaiaqtyǵy kóptegen adamdarǵa, ásirese azamattardyń osal sanattaryna áser etetin ózekti jáne kúrdeli másele bolyp sanalady.
Alaiaqtar kóbinese qurbandarynyń múlkin zańsyz iemdený úshin olardyń sengishtigi men dármensizdigin paidalanady.
«Taraz qalasynyń prokýratýrasy psihikalyq aýytqýshylyqpen aýyratyn 1-toptaǵy 62 jastaǵy múgedek áielge tiesili jyljymaityn múlikti zańsyz iemdený faktisin anyqtady. 2023 jyldyń maýsym aiynda alaiaq onyń jaǵdaiy men dármensizdigin paidalanyp, Taraz qalasy, «Qarataý» móltek aýdanynda ornalasqan eki bólmeli páterdi 9 mln teńgege satyp jibergen.
Prokýratýranyń talap aryzy boiynsha qalalyq sottyń 2024 jylǵy 16 qyrkúiektegi sheshimimen páter iesine qaitaryldy.
Sonymen qatar, qala prokýratýrasy alaiaqqa qatysty Qylmystyq kodekstiń 190-babynyń 3-bóligimen qylmystyq qýdalaýdy bastap, kúdikti qamaýǵa alyndy. Onyń osyǵan uqsas basqa da alaiaqtyqqa qatysy bar ekeni anyqtaldy. Qylmystyq protsestik kodeksiniń 201-babyna sáikes ózge de málimetter jariia etýge jatpaidy», - delingen oblystyq prokýratýra habarlamasynda.
