Keńes tóraǵasy, Májilis depýtaty Berik Ospanovtyń aitýynsha, memleket jyl saiyn aýyl sharýashylyǵyn damytý úshin sýbsidiia túrinde 300 mlrd teńgeden astam qarajat bóledi.
Alaida agrarshylar men fermerler únemi qarajattyń jetkiliksizdigi men ony bólý kezindegi tiimsizdikke shaǵymdanýda.
– Is júzinde sýbsidiialardy agroónerkásip kesheni sýbektileriniń belgili bir toby ǵana alady. Al keide buǵan pestitsidter, tuqymdar jáne taǵy sol siiaqty ónimder satyp alyndy degen jalǵan qujattarmen de qol jetkizedi.
Qarajatty sharýa qojalyqtarynyń 4-6% ǵana alady, al olardyń ózi kóp jaǵdaida ónimdilikti arttyrýǵa qulyqty emes. Bul rette halyq azyq-túlik baǵasynyń ósýine bailanysty mundai sýbektilerdiń tiimsiz jumysyna qosymsha aqsha tóleýge májbúr, – dedi Berik Ospanov.
Óz kezeginde aýyl sharýashylyǵy vitse-ministri Rústem Qurmanov Sybailas jemqorlyqqa qarsy is-qimyl agenttigi júrgizgen keshendi taldaý qorytyndysy boiynsha otandyq jáne importtalǵan asyl tuqymdy maldy satyp alý, selektsiialyq jumysty júrgizý jáne bordaqylaý alańdaryn sýbsidiialaýda kóp jónsizdikter oryn alatynyn aitty.
– Búginde salalyq qaýymdastyqtar men odaqtardyń, agrobiznestiń, ǵylymnyń, múddeli memlekettik organdardyń, onyń ishinde sybailas jemqorlyqqa qarsy qyzmettiń ókilderi kirgen jumys toby sýbsidiialaý tetikterin ońailatý men túrlerin ońtailandyrýdy, aýyl sharýashylyǵyn óndirýdiń barlyq sýbektileri úshin teń qoljetimdilikti qamtamasyz etýdi kózdeitin sýbsidiialar bólý júiesin qaita qaraý boiynsha sharalar ázirleýde. Sýbsidiialaý júiesi ólshenetin indikatorlardy, ashyqtyqqa basymdyq berýdi eskere otyryp, pysyqtalatyn bolady. Aýyl sharýashylyǵy ministrligi men jergilikti atqarýshy organdar arasynda jaýapkershilik «shegin» bólý máseleleri qarastyrylýda. Barlyq tásilder jurtshylyqpen, qaýymdastyqtarmen, odaqtarmen jáne agrobiznes salasymen keńinen talqylanady, – dep atap ótti Rústem Qurmanov.
Keńes tóraǵasy Aýyl sharýashylyǵy vitse-ministrine Agroónerkásiptik keshendi damytýdyń 2021-2025 jyldarǵa arnalǵan ulttyq jobasyn partiianyń sailaýaldy baǵdarlamasyna sáikes daiyndaý qajettigin eske saldy.
Atap aitqanda, ulttyq joba naryqtyń qantpen qamtamasyz etilý kórsetkishin tómendetti, 600 myń gektar jańa sýarmaly jerdi igerý kórsetkishi engizilmegen.
Sondai-aq, Keńes músheleri «Eńbek» memlekettik baǵdarlamasy aiasynda aýyldyq eldi mekender men shaǵyn qalalarda biznes jobalardy júzege asyrý úshin halyqqa nesie berý boiynsha ministrliktiń jumysyn qarady.
Vitse-ministrdiń aitýynsha, 8 myń azamatqa óz biznesin ashý úshin shaǵyn nesie berý boiynsha josparly kórsetkishke jyl sońyna deiin qol jetkiziledi.
Sonymen qatar, Keńes músheleri partiianyń sailaýaldy baǵdarlamasyn iske asyrý boiynsha 2021 jylǵa arnalǵan Jol kartasynyń aýyl sharýashylyǵy ónimderiniń agroónerkásip kesheni ónimderi eksportynyń kólemin 1,3 esege arttyrý jáne ishki naryqty óz óndirisiniń negizgi azyq-túlik taýarlarymen qamtamasyz etý boiynsha birqatar kórsetkishterdiń oryndalmai qalý qaýpi bar ekenin atap ótti.
Otyrys qorytyndysy boiynsha Aýyl sharýashylyǵy ministrligine mal sharýashylyǵy, ósimdik sharýashylyǵy óndirisin ulǵaitý jáne daiyn ónim shyǵarý úshin sýbsidiialardy túpkilikti nátijege qaita baǵdarlaý, sondai-aq Jol kartasynyń barlyq tarmaqtaryn merziminde oryndaý boiynsha sharalar ázirleý usynyldy.
