Qazaqstannyń respýblikalyq mańyzy bar avtojoldarynda júrgizilgen jedel-profilaktikalyq is-sharalar barysynda jalǵan, jasyrylǵan, oqylmaityn nemese talapqa sai ornatylmaǵan memlekettik tirkeý nómirlerin paidalanýǵa qatysty shamamen 900 quqyqbuzýshylyq tirkeldi, dep habarlaidy Dalanews.kz.
Memlekettik nómir – kóliktiń negizgi sáikestendirý belgisi. Ony erkin ári anyq oqýǵa eshteńe kedergi keltirmeýi kerek: nómir standartqa sai ornatylyp, kez kelgen ýaqytta jaqsy kórinip, oqylýy tiis. Eger lastansa, júrgizýshi ony der kezinde tazalaýǵa mindetti. Memlekettik tirkeý nómirinsiz kólik basqarý, jalǵan nemese ózgertilgen nómir qoldaný, sondai-aq nómirdi jasyratyn, burmalaityn nemese tanýǵa kedergi keltiretin qurylǵylardy paidalaný - Jol qozǵalysy erejeleri men Qazaqstan Respýblikasynyń zańnamasyn tikelei buzý bolyp sanalady.
Qandai jaýapkershilik qarastyrylǵan?
ÁQBtK-niń 590-babyna sáikes (2026 jylǵy 1 qańtardan bastap 1 AEK – 4 325 teńge):
1-bólik
Oqylmaityn nemese talapqa sai ornatylmaǵan nómirler - 5 AEK aiyppul (21 625 teńge).
2-bólik
Memlekettik nómirsiz kólik basqarý (sondai-aq tirkelmegen nemese paidalanýǵa tyiym salynǵan kólik) - 10 AEK (43 250 teńge).
2-1-bólik (bir jyl ishinde qaitalansa)
20 AEK (86 500 teńge) nemese sot sheshimimen 1 jylǵa júrgizýshi kýáliginen aiyrý.
3-bólik
Kólikke ádeii jalǵan nemese qoldan jasalǵan nómir ornatý - jeke tulǵalarǵa 15 AEK (64 875 teńge). Laýazymdy tulǵalar men bizneske aiyppul budan da joǵary.
4-bólik
Jalǵan nemese qoldan jasalǵan nómirmen kólik basqarý, sondai-aq nómirdi jasyratyn, burmalaityn nemese tanýǵa kedergi keltiretin materialdar men qurylǵylardy paidalaný - sot sheshimimen 5 táýlikke deiin ákimshilik qamaýǵa alý jáne 1 jylǵa júrgizýshi kýáliginen aiyrý.
Júrgizýshilerge eskertý
Quqyq qorǵaý organdary júrgizýshilerdi jolǵa shyǵar aldynda memlekettik nómirdiń durys bekitilgenin, taza ári anyq oqylatynyn tekserýge shaqyrady.
Nómirdi jasyrýǵa arnalǵan ramkalar, plenkalar, shtorkalar nemese jalǵan nómirlerdi qoldaný tek jol qaýipsizdigine qaýip tóndirip qana qoimai, júrgizýshini qamaýǵa alý men kólik júrgizý quqyǵynan aiyrýǵa deiingi qatań jaýapkershilikke ákelýi múmkin.
