Atyraý qalasynyń ortalyq meshiti "Quspan molla" meshitiniń imamyna qatysty aqparat shyndyqqa janaspaitynyn jetkizdi, dep habarlaidy Dalanews.kz.
"Atyraý oblysynyń ortalyq "Imanǵali" meshiti keibir saittarda, áleýmettik jelilerde Atyraý qalasynyń "Quspan molla" meshitiniń imamyna qatysty taraǵan aqparattyń jalǵan jala ekenin málimdeidi.
Birinshiden, Atyraý qalalyq "Quspan molla" meshitiniń imamy qyzmetin paidalanyp, múftiiatqa balyq, ýyldyryq jiberedi degen sóz jala. Múftiiatqa Atyraýdan "syilyq" jiberý degen bolǵan emes. Ekinshiden, meshit imamy bola tura, únemi nasybai, anasha shegedi, massajǵa barady degen sózder múlde aqylǵa syimaidy. Sebebi "Quspan molla" meshiti qaladaǵy iri qulshylyq oryndarynyń biri bolǵandyqtan, bul jerde atqarylatyn jumys kólemi óte kóp. Sondyqtan meshittiń bas imamy bolǵandyqtan, salmaq ta osy kisige túsedi. Iaǵni, imamnyń negizgi ýaqyty meshitte ótedi", delingen Atyraý ortalyq meshiti habarlamasynda.
Sonymen birge imam qyzmetin paidalanyp, qora-qora mal jidy degen sóz de jalǵan ekenin eskertti. Aitýlarynsha, qazirgi ýaqytta imamnyń kúndelikti saýynǵa ustap otyrǵan bir bas siyry men bir bas túiesi ǵana bar.
"Atyraýdyń kásipkerleri arqyly mal jidy, baiydy degen sóz shyndyqqa janaspaidy. Kásipkerler arasynda meshittiń kerek jabdyqtaryna zattai kómek kórsetedi. Kásipkerler tarapynan kórsetilip otyrǵan kómek túri meshittiń ishki qujattaryna esepke alynyp otyrady", - deidi meshittegiler.
Eske salaiyq, Atyraý qalasyndaǵy "Quspan molla" meshitiniń qyzmetkerleri bas imam Emmat Ǵumarovqa qatysty shaǵymdaryn jýrnalist Oraz Álimbekke hat arqyly jetkizgen edi.
Hatta meshit qyzmetkerleri Qazaqstan Musylmandary Dini Basqarmasynyń tóraǵasy, bas múfti Naýryzbai Ótpenovke birneshe márte aryz jazǵandaryn, alaida eshqandai shara qoldanylmaǵanyn málimdeidi. Meshit jamaǵatynyń janaiqaiy jaýapsyz qaldy dep shaǵymdanǵan.
Jýrnalist Oraz Álimbek hatty jariialai otyryp, aryzdaǵy aiyptaýlardyń shyndyqqa sáikes kelý-kelmeýin bilmeitinin, biraq máseleni múftiiattyń nazaryna jetkizý qajettigin atap ótti.
"Tómendegi aryzda aitylǵan aiyptaýdyń ras iaki ótirigin bilmedim. Múftiiat qalai da jamaǵattyń janaiqaiyna nazar aýdaryp, osy aryz boiynsha tekserý júrgizýi tiis. Sebebi, meshit imamyn taǵaiyndaý Bas múftidiń buiryǵy boiynsha júzege asady. Al meniń qolymda turǵan ne bar?!. Men Aqiqat pen Ádildik izdegen jalańaiaq jýrnalistiń birimin ǵoi, – degen ol meshit jamaǵatynyń hatyn jariialady.
Imamǵa taǵylǵan aiyptar
Aryzda Emmat Ǵumarovtyń dini qyzmetin jeke paidasy úshin paidalanatyny aitylǵan. Aitýlarynsha, imam sadaqa men kásipkerlerdiń qoldaýyn jeke qajettiligine jaratyp, bailyqqa ie bolǵan. Sonymen qatar hatta onyń shariǵatqa qaishy áreketterge, sonyń ishinde jeńiltek qyzdarmen bailanysta bolý jáne shylym shegý sekildi áreketterge barǵany aitylady.
Eń soraqysy, jamaǵat imamnyń Qurandy durys oqi almaitynyn, dini biliminiń taiaz ekenin, meshit minberinde kórgensiz anekdottar aityp, ózin saiqymazaqtai ustaitynyn da málimdegen.
"Atyraýlyq kásipkerler men metsenattardyń arqasynda ábden baiydy, sonyń arqasynda úiir-úiir jylqysy, júzdegen túie men siyr-qoiy bar.
Sonymen qatar Emmat Ǵumarov Qurandy tájýid boiynsha qate oqidy, dini bilimi óte nashar. Eń soraqysy tánin satatyn jeńiltek qyzdarǵa baryp, bodi massaj jasatyp, jynystyq qatynasqa túsetinin dúiim jamaǵat biledi.
Dinimizde tiym salynǵan temeki, nasybai, anasha da shegedi. Ózi quddy bir imam emes, teatrda qyzmet jasaityn saiqymazaq sekildi únemi bylapyt-kórgensiz anekdottar aitady. Emmat Ǵumarov 30-jyl boiy eldi sorlatyp, sáláfizmniń Qazaqstanda taralýyna múddeli Nursultan Nazarbaevty únemi madaqtaýyn toqtatqan emes", - delingen hatta.
