Aitalyq, 2006-2009 jyldyń aralyǵynda Ulttyq qaýipsizdik komitetin basqarǵan Amangeldi Shabdarbaev sol tustary talai saiasi dúmpýdiń aldyn alǵanyn aitypty. Qańtar qyrǵynyna uqsas oqiǵalardyń ushqyny sol jyldary baiqala bastaǵan.
Alaida arnaiy qyzmet ókilderi eldiń shyrqyn buzýdy kózdegen qysqa balaqty, qaýǵa saqaldy lańkesterdiń jolyn kesken.
Onyń tusynda UQK-da ulttyq qaýipsizdikti ulttyq múddemen ushtastyrǵan kadrlar shoǵyrlanypty. Salafitterdiń serkelerin qolǵa túsirgen komitet ókilderi iri úsh qylmystyq topty ydyratyp jibergen. Top músheleriniń kópshiligi qolǵa túsip, endi biri shetel asýǵa májbúr bolǵan.
Sói degen Shabdarbaev:
"Bizdiń kezimizde lańkester kóshýge shyǵýǵa qaimyǵatyn edi. Biz olardyń ár qimylyn ańdyp otyrdyq. Mundai jaǵdaida prezidenttiń buiryǵyn kútip otyrmaityn, arnaiy algoritm ázirledik", – deidi.
...
Globalnews.kz portalyna bergen suhbatynda Shabdarbaev QazAtomnyń eks-tóraǵasy Muhtar Jákishevke kiná artypty. Nazarbaevtyń nusqaýymen "ýran isimen" isimen ainalysqan Shabdarbaev Muhtar Jákishev pen ózine deiingi UQK tóraǵasy Nartai Dútbaev aýyz jalasqan degen pikirde.
"Jákishevtiń "ýran isimen" ainalysý bizge júkteldi. Ekeýiniń telefon arqyly tildeskenin, osy áńgimede Jákishevtiń Dútbaevty "baýyrym" dep jaqyn tartqanyn dúiim el estidi.
Muhtar japondarǵa ýran kenishterin bólip berdi, Nartai ekeýi osy isti ári qaraidy jalǵastyra túsýge múddeli boldy.
Biraq men bul kelisimniń jolyn kestim, Jákishevtiń maǵan burtiyp júrgeni sodan", – deidi ol.
Shabdarbaev Dútbaevtyń ýran saýdasynan úles dámetkenin aitady. Bul iske Jákishevten bólek ázir Frantsiiada jasyrynyp júrgen áigili Muhtar Ábliazov ta atsalysqan. Ábliazov Dútbaevtyń dámetken aqshasyn beretinin (kelissóz somasynyń 10 paiyzy, shamamen 300 mln dollar) aitqanmen jeme-jemge kelgende taqyrǵa otyrǵyzyp ketken.
"Ol Dútbaevtyń úlesin 2009 jyldary qalt-qult etip, bankrottyń aldynda turǵan BTA bankke baǵyttap jiberdi. Nartai ýáde etilgen úlesin ala almai, san soǵyp qaldy. Ábliazov ta, Jákishev te aiypty. Jákishev ýran qorymyzdyń 60 paiyzyn sheteldikterge sý teginge satyp jiberdi. Sol tustaǵy kelisim sharttardy aqtarǵan bolsańyz, barlyǵynda Muhtardyń qoly tur. Nazarbaev tusyndaǵy jii-jii aýysatyn Úkimet basshylarynyń birde-biri muny ańdamaǵan...", – deidi Shabdarbaev.
UQK-nyń burynǵy basshysy budan bólek Zamanbek Nurqadilov týraly pikir bildirip, onyń ólimin tergeýdi qaita bastaý qajettigin aitypty.
"Marqum Zamanbektiń uly Qairat birneshe ret baspasózde ákesiniń ólimin Bas prokýratýra qaita qarastyrýyn suraǵan. Uly surap otyrsa, múmkindik berý kerek dep oilaimyn.
Kimniń durys , kimniń burys ekenin taǵy da tergep, kóz jetkizý kerek. Bul suraqqa qatysty naqty jaýap bere almaimyn. Sebebi qylmystyq ispen IIM ainalysty. Árine, UQK shette qalmady, halyq tergeýdiń durys júrip jatqanyn uǵynýy maqsatynda baqylaýmen ainalysty.
Men Nurqadilovti jeke tanydym. Óte batyl adam edi. Shyndyqty aitýdan qoryqpaityn. Óz pikirin ashyq aita bildi. Mundai azamattyń ózine-ózi qol jumsaǵanyna senbeimin", – deidi ol.
Shabdarbaev Qańtar oqiǵasy aldyn ala uiymdastyrylǵanyna senimdi.
"Maqsattary — bilikke kelý. Olar Qasym-Jomart Toqaev halyq tolqýynan qorqyp, Qyrǵyzstannyń burynǵy el basshylary siiaqty memleketten qashyp ketedi dep oilady. Biraq oilary iske aspady.
Endi keibir qashqyndar Prezidenttiń sózin burmalap, ol halyqqa ot jaýdyryńdar degen buiryq bergen desedi.
El basshysy beibit halyqty emes, qarýlanǵan terroristerdiń kózin eskertýsiz joiýǵa tapsyrys berdi", – deidi UQK-nyń eks tóraǵasy.
