ايتالىق، 2006-2009 جىلدىڭ ارالىعىندا ۇلتتىق قاۋىپسىزدىك كوميتەتىن باسقارعان امانگەلدى شابداربايەۆ سول تۇستارى تالاي ساياسي ءدۇمپۋدىڭ الدىن العانىن ايتىپتى. قاڭتار قىرعىنىنا ۇقساس وقيعالاردىڭ ۇشقىنى سول جىلدارى بايقالا باستاعان.
الايدا ارنايى قىزمەت وكىلدەرى ەلدىڭ شىرقىن بۇزۋدى كوزدەگەن قىسقا بالاقتى، قاۋعا ساقالدى لاڭكەستەردىڭ جولىن كەسكەن.
ونىڭ تۇسىندا ۇقك-دا ۇلتتىق قاۋىپسىزدىكتى ۇلتتىق مۇددەمەن ۇشتاستىرعان كادرلار شوعىرلانىپتى. سالافيتتەردىڭ سەركەلەرىن قولعا تۇسىرگەن كوميتەت وكىلدەرى ءىرى ءۇش قىلمىستىق توپتى ىدىراتىپ جىبەرگەن. توپ مۇشەلەرىنىڭ كوپشىلىگى قولعا ءتۇسىپ، ەندى ءبىرى شەتەل اسۋعا ءماجبۇر بولعان.
ءسوي دەگەن شابداربايەۆ:
"ءبىزدىڭ كەزىمىزدە لاڭكەستەر كوشۋگە شىعۋعا قايمىعاتىن ەدى. ءبىز ولاردىڭ ءار قيمىلىن اڭدىپ وتىردىق. مۇنداي جاعدايدا پرەزيدەنتتىڭ بۇيرىعىن كۇتىپ وتىرمايتىن، ارنايى الگوريتم ازىرلەدىك"، – دەيدى.
...
Globalnews.kz پورتالىنا بەرگەن سۇحباتىندا شابداربايەۆ قازاتومنىڭ ەكس-توراعاسى مۇحتار جاكىشيەۆكە كىنا ارتىپتى. نازاربايەۆتىڭ نۇسقاۋىمەن "ۋران ىسىمەن" ىسىمەن اينالىسقان شابداربايەۆ مۇحتار جاكىشيەۆ پەن وزىنە دەيىنگى ۇقك ءتوراعاسى نارتاي دۇتبايەۆ اۋىز جالاسقان دەگەن پىكىردە.
"جاكىشيەۆتىڭ "ۋران ىسىمەن" اينالىسۋ بىزگە جۇكتەلدى. ەكەۋىنىڭ تەلەفون ارقىلى تىلدەسكەنىن، وسى اڭگىمەدە جاكىشيەۆتىڭ دۇتبايەۆتى "باۋىرىم" دەپ جاقىن تارتقانىن ءدۇيىم ەل ەستىدى.
مۇحتار جاپوندارعا ۋران كەنىشتەرىن ءبولىپ بەردى، نارتاي ەكەۋى وسى ءىستى ءارى قارايدى جالعاستىرا تۇسۋگە مۇددەلى بولدى.
ءبىراق مەن بۇل كەلىسىمنىڭ جولىن كەستىم، جاكىشيەۆتىڭ ماعان بۇرتيىپ جۇرگەنى سودان"، – دەيدى ول.
شابداربايەۆ دۇتبايەۆتىڭ ۋران ساۋداسىنان ۇلەس دامەتكەنىن ايتادى. بۇل ىسكە جاكىشيەۆتەن بولەك ءازىر فرانسيادا جاسىرىنىپ جۇرگەن ايگىلى مۇحتار ءابليازوۆ تا اتسالىسقان. ءابليازوۆ دۇتبايەۆتىڭ دامەتكەن اقشاسىن بەرەتىنىن (كەلىسسوز سوماسىنىڭ 10 پايىزى، شامامەن 300 ملن دوللار) ايتقانمەن جەمە-جەمگە كەلگەندە تاقىرعا وتىرعىزىپ كەتكەن.
"ول دۇتبايەۆتىڭ ۇلەسىن 2009 جىلدارى قالت-قۇلت ەتىپ، بانكروتتىڭ الدىندا تۇرعان بتا بانككە باعىتتاپ جىبەردى. نارتاي ۋادە ەتىلگەن ۇلەسىن الا الماي، سان سوعىپ قالدى. ءابليازوۆ تا، جاكىشيەۆ تە ايىپتى. جاكىشيەۆ ۋران قورىمىزدىڭ 60 پايىزىن شەتەلدىكتەرگە سۋ تەگىنگە ساتىپ جىبەردى. سول تۇستاعى كەلىسىم شارتتاردى اقتارعان بولساڭىز، بارلىعىندا مۇحتاردىڭ قولى تۇر. نازاربايەۆ تۇسىنداعى ءجيى-جيى اۋىساتىن ۇكىمەت باسشىلارىنىڭ بىردە-بىرى مۇنى اڭداماعان..."، – دەيدى شابداربايەۆ.
ۇقك-نىڭ بۇرىنعى باسشىسى بۇدان بولەك زامانبەك ءنۇرقادىلوۆ تۋرالى پىكىر ءبىلدىرىپ، ونىڭ ءولىمىن تەرگەۋدى قايتا باستاۋ قاجەتتىگىن ايتىپتى.
"مارقۇم زامانبەكتىڭ ۇلى قايرات بىرنەشە رەت باسپاسوزدە اكەسىنىڭ ءولىمىن باس پروكۋراتۋرا قايتا قاراستىرۋىن سۇراعان. ۇلى سۇراپ وتىرسا، مۇمكىندىك بەرۋ كەرەك دەپ ويلايمىن.
كىمنىڭ دۇرىس ، كىمنىڭ بۇرىس ەكەنىن تاعى دا تەرگەپ، كوز جەتكىزۋ كەرەك. بۇل سۇراققا قاتىستى ناقتى جاۋاپ بەرە المايمىن. سەبەبى قىلمىستىق ىسپەن ءىىم اينالىستى. ارينە، ۇقك شەتتە قالمادى، حالىق تەرگەۋدىڭ دۇرىس ءجۇرىپ جاتقانىن ۇعىنۋى ماقساتىندا باقىلاۋمەن اينالىستى.
مەن ءنۇرقادىلوۆتى جەكە تانىدىم. وتە باتىل ادام ەدى. شىندىقتى ايتۋدان قورىقپايتىن. ءوز پىكىرىن اشىق ايتا ءبىلدى. مۇنداي ازاماتتىڭ وزىنە-وزى قول جۇمساعانىنا سەنبەيمىن"، – دەيدى ول.
شابداربايەۆ قاڭتار وقيعاسى الدىن الا ۇيىمداستىرىلعانىنا سەنىمدى.
"ماقساتتارى — بيلىككە كەلۋ. ولار قاسىم-جومارت توقايەۆ حالىق تولقۋىنان قورقىپ، قىرعىزستاننىڭ بۇرىنعى ەل باسشىلارى سياقتى مەملەكەتتەن قاشىپ كەتەدى دەپ ويلادى. ءبىراق ويلارى ىسكە اسپادى.
ەندى كەيبىر قاشقىندار پرەزيدەنتتىڭ ءسوزىن بۇرمالاپ، ول حالىققا وت جاۋدىرىڭدار دەگەن بۇيرىق بەرگەن دەسەدى.
ەل باسشىسى بەيبىت حالىقتى ەمەس، قارۋلانعان تەرروريستەردىڭ كوزىن ەسكەرتۋسىز جويۋعا تاپسىرىس بەردى"، – دەيدى ۇقك-نىڭ ەكس ءتوراعاسى.
