Búgin «Qazatomóndiris» kompaniiasynyń burynǵy basshysy Muhtar Jákishev bostandyqqa shyqty. Onyń bostandyqqa shyqqanyna birinshi kezekte qarapaiym halyq qatty qýanǵanyna kýá boldyq.
Áleýmettik jeliden Muhtar Jákishevpen qaýyshý úshin túzeý mekemesiniń aldyna elimizdiń túkpir-túkpirinen qarapaiym azamattar men qoǵam belsendileri jinalǵanyn kórdik. Nesin aitasyz, halyq qýanyshynda shek bolǵan joq.
Jákishev túrmeden shyqqanda kólikti toqtatyp, jinalǵan qaýymǵa alǵysyn aittyp, olardyń qolyn alyp yqylas tanytty. Jinalǵan qaýym qazaq tilinde «Muhtar jasasyn!» dep urandatqanyn da estidik.
Jákishev túrmeden shyqqan bette halyqtyń ózine degen yqylasyn kórip, erekshe tolqyǵany anyq. Ol aldyn kes-kestei bergen jubaiyna qaramastan ózin qoldap kelgen qarapaiym azamattardyń qolyn aldy.Muhtar Jákishev bir-eki minýt aialdaǵannan keiin kólikke minip, ketip qaldy. Budan keiin bizder Muhtar Jákishev qandaida bir meiramhanada qoldaýshylarynyń basyn qosyp, bir dastarhan basynda pikirlesetin shyǵar dep oiladyq. Kezdesýdegi fotony azamattyq belsendiler áleýmettik jelige júkteitin shyǵar degen úmitpen jelini aqtaryp, taba almadyq. Biraq basqa foto tabyldy.
Joǵarydaǵy fotoda bir ǵimaratta jaǵdaiy kelisken Nurlan Smaǵulov, Armanjan Baitasov, Raiymbek Batalov bastaǵan kásipkerler Jákishevty qarsy alǵan fotosyn kórdik.
Túrme aldynda Jákishevty bir-eki saǵat boiy kútken halyqtyń biri de joq. Bul jerde Jákishevke kiná artaiyq degen nietimiz joq. Endi ǵana bostandyqqa shyqqan azamat aldaǵy ýaqytta halyqpen bólek kezdesip, alǵysyn aita jatar.
Jalpy Jákishevtiń bostandyqqa shyǵýyna kim áser etti? Árine halyq. Halyqtyń talaby bilikti iliktirdi.
Kerek deseńiz, kúni keshe ǵana mert bolǵan Dýlat Aǵadildiń qazasy Jákishevtiń túrmeden shyǵýyna airyqsha áser etkeni anyq.
Aldaǵy ýaqytta osy jaitty eskerip, Muhtar Jákishev Dýlat Aǵadildiń úiine baryp, kóńil aitýy tiis dep esepteimiz. Bul Muhtar Jákishevtyń basty azamattyq paryzy bolmaq.
Árine, Muhtar Jákishevtiń dostarymen qaýyshýyna tolyqtai qaqysy bar. Biraq sýrettegi azamattardyń bári elimizdiń qoǵamdyq-saiasi ómirine aralasyp júrgen tanymal kásipkerler ekenin bilemiz. Olar Jákishevti bosatý úshin qoldan kelgen kómegin aiamaǵanyn da bilemiz.
Biraq olar azamattyq pozitsiiasyn aiqyndap, qarapaiym halyqpen birge iyqtasyp turyp, dostaryn túrmeniń aldynda nege qarsy almaidy? Olar túrme aldynan kelýden bilikten qorqa ma? Joq. Bilik olardy mundai áreketi úshin túk te istemesi anyq.
Olar qarapaiym azamattarmen birge bir saǵat boiy túzeý mekemesine aldynda tursa, tabandarynan syz ótip aýyryp qala ma? Joq aýyrmaidy. Bizdiń biznesmen, demokrat degen kóptegen azamattar halyqtyń arasyna kelýden qorqady.
Kóz aldyǵyzǵa elestetińizshi, Smaǵulov, Batalov, Baitasov halyqpen midai aralassa qandai ádemi kórinis bolar edi. Biraq olar dostaryn jaily qonaq úide alańsyz, mol dastarhannyń basynda kútip alǵandy jón sanady.
Olar osy áreketimen halyq pen Jákishevtiń arasynda endi ornap kele jatqan jyly qatynasqa... syzat túsirip alǵandarynda ańǵarmady.
Esińizde shyǵar, Ǵalymjan Jaqiianov túrmeden bosap Almatyǵa kelgende temir jol vokzalynda halyq Ǵalymjannyń qushaǵyn gúlge toltyryp tastady emes pe?
Semeide osyndai jaǵdaiǵa kýá bolamyz dep úmittengen edik. Biraq elimizdiń apaitós kásipkerleri Jákishevti halyqtan bólektep alyp ketkeni kóńilge kirbiń uialatqanyn jasyryp qaitemiz?
Nurlan JUMAHAN
