Sarapshylar Muhtar Jákishevtiń Vadim Boreikoǵa bergen suhbatyn taldady. Áńgime ýran ken oryndarynyń sheteldikterge tiyn-tebenge satylyp ketkeni týraly bolyp otyr, - dep habarlaidy Dalanews.kz.
Sarapshy Nurlan Jumaǵulov Facebook-te "Qazatomónerkásip" úlesi Ábiliazovqa qansha aqshaǵa satylǵanyn, al ol keiin shetelderge úlesin satyp, qalai baiyǵanyn aitady.
"Bul joly olar (Jákishev pen Boreiko - esk.) ýran ken oryndary kanadalyqtarǵa tiyn-tebenge satylǵanyn túsindirýge tyrysty. Ókinishke qarai, internet bárin esinde saqtaidy. 2005 jyly "Qazatomónerkásip" 120 myń dollarǵa "Qyzylqum" JShS-degi úlesiniń 30 paiyzyn Ábiliazovqa satty, keiin ol kanadalyq kásipkerge satty. Birneshe aidan keiin, 2005 jylǵy qarashada kanadalyq kásipker bul úlesti (30 paiyzdy) Uranium One kompaniiasyna 75 million dollarǵa qaita satty.
Jákishev ýran baǵasynyń bir fýnty 136 dollar bolǵan kezde úles satylǵanyn aitqan sátte qiturqylyq jasap otyr (mundai baǵa 2006 jyly boldy).
Qandai da bir sebeptermen Jákishev "Betpaq Dala" jobasyndaǵy 70 paiyz úles satylǵanyn aitpady. Óitkeni ol "Qazatomónerkásiptiń" ýran ýchaskelerinde kem degende 50 paiyzyn saqtap qaldy. 70 paiyzdy kanadalyq kásipker Ábiliazovtan satyp alǵannan keiin Uranium One-ǵa 350 million dollarǵa satty.
"Qazatomónerkásip" Býdenov ken ornynyń ýran ýchaskelerin Anisimovqa tiynǵa satyp jibergeni týraly áńgime bolǵan joq (7 ýchaskege bólingen, barlyq jerde "Qazatomónerkásip" úlesi - 51 paiyz). Nelikten Anisimov Aqbastaý (1,3,4 ýchaskeler) jáne Qarataý (2 ýchaskesi) úlesterin satýdan júzdegen million dollar, al Býdenov ken ornynyń 6 jáne 7-ýchaskeleri boiynsha sońǵy mámilede 1,3 mlrd. tabys tapty?
Jákishev "jarap tur": "Qazatomónerkásipti" kóterdi. Biraq onyń alaiaqtyǵynyń arqasynda Ábiliazov, Klebanov, Anisimov qaltasyn qalyńdatqan bolyp tur ma?" - dep jazdy ol.
Aita keteiik, buǵan deiin "Qazatompromǵa" qarasty "Býdenov" kenishi reseilikterdiń qaramaǵyna ótti. "Rosatom" budan bylai kenishtiń 49 paiyz aktsiiasyna ielik etedi.
Alaida "Qazatompromnyń" burynǵy basshylyǵy: bas direktor Ǵalymjan Pirmatov, basqarma tóraǵasy Májit Sháripov, bas operatsiialyq direktor Asylan Bólekbai jáne basqa da top-menedjerler "Býdennovty" reseilik monopoliske satýǵa qarsy bolǵan.
DALA INSIDE málimetinshe, "Rosatom" "Samuryq Qazynaǵa" 1,6 mlrd dollar bergen. Kelisimdi "Gazprom" qarjylandyrǵan.
"Reseilikter 2045 jylǵa deiin kenishtiń qyzyǵyn kórmek. Kenishtegi barlanǵan ýran qory 250 myń tonnadan asyp jyǵylady.
Reseilik monopolist "Býdenovke" budan buryn aýyz salǵan. 2009 jyly "Rosatom" kenishtiń 4 ýchaskesin satyp alady. Al kúni keshegi kelisimge sai №5, 6 jáne 7-shi ýchaskelerdiń qoinaýyndaǵy ýrandy "Qazatommen" birlesip óndiredi. Bylaisha aitqanda, "Býdenov" basybaily Reseidiń qaramaǵyna ótti deýge negiz bar", - dep jazdy arna.
