Astanada basyna kondısıoner qulap, aýyr jaraqat alǵan feldsherdiń jaǵdaıy aýyr. Bul týraly Densaýlyq saqtaý vıse-mınıstri Tımýr Muratov málimdedi, dep habarlaıdy Dalanews.kz.

“Iá, onyń jaǵdaıy óte aýyr, qazirgi ýaqytta jansaqtaý bóliminde jatyr. Kómek tolyq kólemde kórsetilip otyr. Negizgi jedel sharalar jasaldy”, – dedi Muratov.

Vıse-mınıstr zardap shekkenderge Tótenshe jaǵdaı qyzmetteri kelgenge deıin jedel kómek kórsetýge at salysqan feldsherdiń is-áreketin batyrlyq dep baǵalady.

“Taǵy bir naýqastyń da jaǵdaıy aýyr, jansaqtaý bóliminde jatyr. Al qalǵan úsh naýqastyń ómirine qaýip tónip turǵan joq, olar tıisti em alyp jatyr”, – dep habarlady mınıstrlik ókili.

Eske salaıyq, 8 qarasha kúni Astananyń Almaty aýdanynda, Táýelsizdik dańǵyly 24B mekenjaıynda ornalasqan toǵyz qabatty turǵyn úıdiń syrtqy kirpish qaptamasy men kondısıoner ornatylǵan bóligi qulap, birneshe adamdar zardap shekti.