J. Túimebaev: "Ońtústiktiń aýyl sharýashylyǵy taýarlary eksporty 3 esege artady"
Qazirgi kezde Qazaqstannyń agroónerkásip sektory turaqty damý ústinde. Ońtústik óńiri agrarlyq aimaq bolǵandyqtan, bul baǵytta da jańa tehnologiialar engizý boiynsha jumystar júieli túrde atqarylyp otyr. Búgingi tańda óńirdegi agrarlyq sektordy igerý jáne innovatsiialardy engizý eń mańyzdy máselelerdiń birine ainalýda. Osy jaittarǵa toqtalǵan oblys ákimi aldaǵy ýaqytta intensivti baq, tamshylatyp sýǵarý, jylyjai kólemin ulǵaitý baǵyttarynda jańa tehnologiialar engizý arqyly ónimdilikti artyrýǵa bolatynyn atap ótti.
– Qazirgi tańda Saýd Araviia, BAÁ men Irak memleketterine qoi etin eksporttaý boiynsha aldyn-ala kelisimder jasalyp otyr. Jalpy 2021 jylǵa aýyl sharýashylyǵy taýarlary eksportyn kem degende 3 esege arttyrýymyz qajet. QR Aýyl sharýashylyǵy, Eńbek jáne áleýmettik qorǵaý ministrlikteri, Ońtústik Qazaqstan oblysy ákimdigi arasynda túzilgen úshjaqty is-sharalar josparynda bekitilgen 75 indikatorlyq kórsetkish 158 birlikke nemese 2,1 esege oryndaldy. Biylǵy jyly 3000-nan kem emes úi sharýashylyqtarynan biriktirilgen 102 kooperativ quratyn bolamyz, – dedi Janseiit Qanseiituly.
Búginde oblysymyzdaǵy 21 mekeme ózderiniń azyq-túlik ónimderin turaqty túrde eksportqa shyǵaryp keledi.
Budan bólek, oblys boiynsha 457 myń gektar sýarmaly jerlerdi aǵyn sýmen jalpy uzyndyǵy 14 myń shaqyrymdy quraityn 2325 kanal qamtamasyz etedi. Onyń 9 myń shaqyrymy kommýnaldyq menshiktegi 1105 kanaldyń 4,6 myń shaqyrymy jóndeýdi qajet etedi. Úsh jyl ishinde jóndeýdi qajet etetin sý sharýashylyǵy qurylystarynyń 50 paiyzy qalpyna keltiriledi.
Ońtústik óńiri úshin Batys Eýropa – Batys Qytai tranzittik joly erekshe mańyzǵa ie. Intellektýaldy kólik júiesin engizý maqsatynda Shymkent qalasy boiynsha «Smart Siti» jobasy sheńberinde qalaǵa kire beris jeti jerden aýyr salmaqty júk kólikterin qadaǵalaý úshin arnaiy tarazy men arka qurý josparda bar.
Óńirimizde memlekettik qoldaýdyń arqasynda turǵyn úi qurylysynyń kólemi de jyl saiyn artyp keledi. 2017 jyldyń basynan «Nurly jer» turǵyn úi qurylysy baǵdarlamasy aiasynda 721,149 myń sharshy metrdi quraityn jalpy sany 7500-ge jýyq páter berilgen.
Elbasy aitqan Qazaqstannyń kieli oryndarynyń kartasyna Ońtústik Qazaqstan oblysynan 35 nysan qosyldy. «Týǵan jer» baǵdarlamasynyń aiasynda jalpy quny 31,5 mlrd. teńgeni quraityn 577 joba qolǵa alynǵan.
Oblys ákimi J. Túimebaev ońtústikqazaqstandyqtardy Elbasymyzdyń bastamalaryn qoldap, Joldaýynda atap kórsetilgen máselelerdi iske asyrýǵa belsendi qatysyp, oblystyń áleýmettik-ekonomikalyq damýy men saiasi turaqtylyqty qamtamasyz etýge bar kúsh-qairatty jumsaýǵa shaqyrdy.
OQO ákiminiń baspasóz qyzmeti
https://dalanews.kz/33427
