Qazaqstandyq bloger Qaısar Qamza ózine qatysty jaǵdaıǵa qysqasha pikir bildirdi, dep habarlaıdy Dalanews.kz.
Ol áleýmettik jelidegi paraqshasynda dastarhan basynda túsken sýretin jarıalap, "bári jaqsy" degen jazba qaldyrǵan.
Aıta keteıik, kúni keshe Qaısar Qamzaǵa resmı túrde izdeý jarıalanǵany týraly aqparat tarady.
Ashyq aqparat kózderine sáıkes, blogerge qatysty sotqa deıingi tergep-tekserý amaldary júrgizilip jatyr. Osyǵan baılanysty onyń naqty qaı jerde júrgeni anyqtalmaǵandyqtan, ýákiletti organdar izdeý sharalaryn bastaǵan.
İzdeý isi Astana qalasynda tirkelgen, al tergeýdi Qazaqstan Respýblıkasy Qarjy monıtorıńi agenttiginiń ekonomıkalyq tergeý organdary júrgizip otyr.
Qaısar Qamza áleýmettik jeliler arqyly keńinen tanylǵan. Ol buǵan deıin jarnamalyq jobalar men onlaın belsendiligi arqyly kópshilikke belgili bolǵan. Quzyrly organdar ázirge istiń naqty mán-jaıyn, sondaı-aq qandaı bap boıynsha tergeý júrip jatqanyn jarıa etken joq.
Eske salaıyq, blogerdiń Instagram jelisinde 2,4 mıllıon jazylýshysy bar. 2025 jyly Týrızm jáne sport mınıstrligi Qaısar Qamzany zańsyz onlaın utys oıyndaryn ótkizgen tulǵalar tizimine engizgen. Sol kezde oǵan 1 179 600 teńge kóleminde aıyppul salynǵan. Alaıda bul jaıttyń qazirgi izdeý isimen baılanysy bar-joǵy ázirge belgisiz.
Qazirgi ýaqytta tergeý amaldary jalǵasýda. Qosymsha aqparat resmı derekkózderden naqtylanǵan soń habarlanatyn bolady.
