Almatynyń qoǵamdyq keńistigine eki myńǵa jýyq iri kólemdi aǵash otyrǵyzylýda. Bul týraly Almaty qalasynyń ekologiia jáne qorshaǵan orta basqarmasy málimdedi,- dep habarlaidy Dalanews.kz
Almatyda «Taza Qazaqstan» respýblikalyq baǵdarlamasy jáne «Almaty – bizdiń ortaq úiimiz» qalalyq baǵdarlamasy aiasynda iri kólemdi aǵash kóshetterin otyrǵyzý jumystary belsendi júrgizilýde. Biiktigi keminde 6 metr, jergilikti pitomnikterde ósirilgen jáne klimattyq jaǵdailarǵa beiimdelgen aǵashtar Buqtyrma kóshesi, Rysqulov jáne ál-Farabi dańǵyldarynyń boiyna, sondai-aq birqatar qalalyq skverlerge otyrǵyzylady.
Jiembaev atyndaǵy QazǴZI ósimdikterdi qorǵaý jáne karantin bóliminiń ǵylymi qyzmetkeri Nurjan Muhamadievanyń pikirinshe, iri kóshetter ońai beiimdelip, tamyr alady.
«Otyrǵyzylǵan úlken kóshetter – qaraǵai, qaraǵash, shyrsha bizdiń klimattyq jaǵdailarymyzǵa beiimdelgen jáne estetikalyq kórinisti ǵana emes, sonymen qatar bos emes qalalyq keńistikter boiyndaǵy ekologiialyq jaǵdaidy jaqsartýǵa yqpal etedi», - dedi ol.
Jalpy, aldaǵy aida qalada Saiyn, Rysqulov, Sátbaev kósheleriniń ýchaskelerinde, Kókjiek sh/a jáne basqa da qoǵamdyq keńistikterde 2 myńǵa jýyq iri kólemdi aǵash otyrǵyzý josparlanǵan. Búgingi tańda 600-den astam kóshet otyrǵyzyldy.
Aǵashtardyń uzaq merzimdi saqtalýyn qamtamasyz etý úshin otyrǵyzý ýchaskelerinde ǵalymdardyń usynystary boiynsha jazda da, kúzgi-qysqy kezeńde de qajetti mineraldy tyńaitqyshtardy paidalana otyryp, kútim qamtamasyz etiledi.
