Almaty oblysynda Ile aýdanynyń eks-ákimi Baǵdat Qarasaevqa qatysty sot protsesi aiaqtaldy. Ol qyzmettik ókilettigin teris paidalanǵany jáne zańsyz kásipkerlikke qatysqany úshin kináli dep tanylyp, sot sheshimimen bas bostandyǵynan aiyryldy, dep habarlaidy Dalanews.kz Qazaqparatqa silteme jasap.
Sot materialdaryndaǵy málimetke sáikes, Qarasaev ákim bolyp turǵan kezinde laýazymyn paidalanyp, bir jaýapkershiligi shekteýli seriktestikke jer telimin zańsyz túrde rásimdep bergen. Odan bólek, qatty turmystyq qaldyqtar poligonynyń jumysyn uiymdastyrý kezinde sol kásiporynǵa qolaily jaǵdai jasap, onyń qyzmetine tikelei aralasqany anyqtalǵan.
Sot Qylmystyq kodekstiń 361-babynyń 3-bóligi jáne 364-babynyń 3-bóligi boiynsha aiypty dep tanyp, Qarasaevqa 3 jyl 3 aiǵa bas bostandyǵynan aiyrý jazasyn belgiledi. Sonymen qatar ol ómir boiyna memlekettik qyzmette laýazymdy mindetter atqarý quqyǵynan aiyryldy.
Iste figýrant bolǵan ózge tulǵalar da jazaǵa tartyldy. B. esimdi áielge memlekettik qurylymdarda jumys isteýge ómir boiyna tyiym salynyp, 1 jyl bas bostandyǵyn shekteý jazasy taǵaiyndaldy. D. esimdi azamat 3 jyl boiy memlekettik múlikti senimgerlik basqarýǵa qatysý quqyǵynan aiyrylyp, 2 jyl 6 aiǵa bas bostandyǵy shekteldi. Al M. esimdi taǵy bir qatysýshy tolyq aqtalyp shyqty.
Úkim ázirge kúshine engen joq.
Eske salaiyq, 2024 jyly 4 qyrkúiekte Qarasaevtyń ustalǵany belgili boldy.
Baǵdat Qarasaev Ile aýdanyn 2018 jylǵy qyrkúiekten bastap basqardy. Oǵan deiin Almaty oblysy ákiminiń keńesshisi, Taldyqorǵan qalasynyń ákimi, sondai-aq oblys ákimdigi apparatynyń basshysy qyzmetterin atqarǵan.
Ile aýdanynyń ákimshilik ortalyǵy – Almaty irgesindegi Ótegen batyr kenti (GRES). Aýdan aýmaǵynan birneshe temirjol jelileri men avtokólik joldary ótedi, munda kóptegen logistikalyq habtar men temirjol tuiyqtary ornalasqan. Olardyń arasynda "sońǵy kilometr" dep atalatyn infraqurylym da bar. Osy faktorlardyń áserinen Ile aýdany Almaty oblysyndaǵy eń bai aýdandardyń biri sanalady jáne óńir biýdjetine edáýir úles qosyp keledi.
Sonymen qatar, Qarasaevtyń ustalýyna qatysty Almaty oblysynyń ákimi Marat Sultanǵaziev pikir bildirgen bolatyn.
