Ishki ister ministrliginiń Tergeý departamenti qylmystyq isterdi tergeý barysynda zańdylyqty qamtamasyz etý, azamattardyń quqyqtaryn qorǵaý jáne jábirlenýshilerge keltirilgen shyǵyndy óteý baǵytyndaǵy júieli jumysyn jalǵastyryp jatyr, dep habarlaidy dalanews.kz.
Tergeý departamentiniń bastyǵy Samat Aisovtyń aitýynsha, vedomstvo azamattardyń konstitýtsiialyq quqyqtaryn qorǵaýǵa, qylmystyq isterdi zań talaptaryna sai tergeýge, qylmystan kelgen zalaldy óteýge, kinálilerdiń jaýapkershiligin qamtamasyz etýge jáne quqyq buzýshylyqtardyń aldyn alýǵa basymdyq beredi.
Onyń sózinshe, bul baǵyttaǵy tiimdi tetikterdiń biri – Qylmystyq-protsestik kodekstiń 200-babyna sáikes engiziletin tergeýshi usynystary. Jyl basynan beri tergelip jatqan qylmystyq ister aiasynda memlekettik organdarǵa, mekemeler men uiymdarǵa shamamen 45 myń usynys joldanǵan.
Qaýipsizdik sharalary kúsheitildi
Usynystardy qaraý nátijesinde qoǵamdyq qaýipsizdikti arttyrýǵa baǵyttalǵan naqty sharalar qabyldanǵan. Atap aitqanda:
* áleýmettik jaǵdaiy kúrdeli aýdandarda, saýda jáne oiyn-saýyq oryndarynda qosymsha eki myńǵa jýyq beinebaqylaý kamerasy ornatyldy;
* jol-kólik oqiǵalary jii bolatyn 155 ýchaskede jaryqtandyrý júieleri, baǵdarshamdar, jol belgileri men jol tańbalary jańartyldy;
* 56 nysanda qaýipsizdik sharalary kúsheitilip, kúzet júieleri jańǵyrtyldy;
* bilim berý uiymdarynda 60-tan astam profilaktikalyq is-shara ótkizildi.
Pavlodardaǵy laýndj-bardyń jumysy toqtatyldy
Samat Aisovtyń málimetinshe, qylmysty qaitalap jasaǵan segiz shartty túrde sottalǵan azamat jazasyn óteý úshin bas bostandyǵynan aiyrý oryndaryna jiberilgen.
Sondai-aq zańsyz qyzmetpen ainalysqan tórt sýbektiniń jumysy toqtatylyp, 15 kafe men túngi klýbtyń jumys ýaqytyna shekteý qoiylǵan.
Naqty mysal retinde biyl qańtarda buzaqylyq oqiǵasy tirkelgennen keiin Pavlodardaǵy laýndj-barlardyń biriniń qyzmeti toqtatylǵan.
Avtobýs órtengennen keiin jappai tekserý júrgizildi
Qaraǵandy oblysyndaǵy Aqsý-Aiýly – Balqash avtojolynda jolaýshylar avtobýsy órtenip, saldarynan kámeletke tolmaǵan balanyń qaza bolýyna bailanysty tergeýshiniń usynysymen barlyq jolaýshylar avtobýstaryna keshendi tekserý júrgizilgen.
Tekserý qorytyndysynda 199 júrgizýshi men avtobýs iesi ákimshilik jaýapkershilikke tartyldy. Onyń ishinde 55 adam avtobýstyń salonyn tiisti ruqsatsyz jatyn orynǵa beiimdegeni úshin jaýapqa tartylǵan.
Usynystardy qaraý nátijesinde qylmystyń jasalýyna jol bergen áreketsizdigi úshin eki myńnan astam laýazymdy tulǵa tártiptik jaýapkershilikke tartylsa, taǵy 500-den astam adam usynystardy qaraý boiynsha qajetti sharalardy qabyldamaǵany úshin ákimshilik jaýapkershilikke tartylǵan.
34 mlrd teńgeden astam shyǵyn óteldi
IIM málimetinshe, jábirlenýshilerge keltirilgen shyǵyndy óteýge erekshe nazar aýdarylyp otyr. Búginde aiaqtalǵan qylmystyq ister boiynsha jalpy shyǵyn kólemi 72 mlrd teńgeden asqan. Sonyń 34 mlrd teńgeden astamy ótelgen. Mysaly, Astanada internet-alaiaqtyqtan zardap shekken 111 azamatqa keltirilgen 140 mln teńgeden astam shyǵyn tolyq kólemde qaitarylǵan.
Sonymen qatar shyǵyndy óteýdi qamtamasyz etý maqsatynda jalpy quny 29 mlrd teńgeden asatyn múlikke tyiym salynǵan. Onyń ishinde Almaty oblysynda alaiaqtyq isi boiynsha eki jaýapkershiligi shekteýli seriktestiktiń jalpy quny 7 mlrd teńgeden asatyn 28 jyljymaityn múlik nysanyna tyiym salynǵan.
Ótemaqy qorynan 831 mln teńge tólendi
Samat Aisovtyń aitýynsha, azamattardy áleýmettik qoldaý maqsatynda Jábirlenýshilerge ótemaqy tóleý qory jumys isteidi. Ótemaqy alý quqyǵy qylmystyń 124 quramy boiynsha qarastyrylǵan. Tólem mólsheri 30-dan 50 ailyq eseptik kórsetkishke deiin belgilengen. Qor jumys istei bastaǵaly beri bes myńnan astam jábirlenýshige jalpy somasy 831 mln teńgeden astam ótemaqy tólengen.
Bolashaq tergeýshilerdi daiarlaý jalǵasýda
IIM-de bolashaq tergeýshiler men anyqtaýshylardy daiarlaýǵa da erekshe kóńil bólinedi. Bul jumys vedomstvolyq oqý oryndary arqyly jáne azamattyq joǵary oqý oryndarynyń zań fakýltetterimen birlesip júrgizilýde. 2019 jyldan beri zań fakýltetteriniń stýdentterine arnalǵan dýaldy oqytý baǵdarlamasy iske asyrylyp keledi.
Qazirgi tańda joǵary oqý oryndarymen 40 yntymaqtastyq týraly memorandým jasalǵan. 47 stýdenttik klýb jumys isteidi, olardyń quramynda 1 524 stýdent bar. Al 100-den astam túlek diplom alǵannan keiin ishki ister organdaryna jumysqa ornalasýdy josparlap otyr.
Samat Aisovtyń sózinshe, atqarylyp jatqan jumystar quqyq buzýshylyqtyń aldyn alýdan bastap, jábirlenýshilerdiń shyǵynyn óteý men bolashaq kadrlardy daiarlaýǵa deiingi keń aýqymdy qamtidy. Onyń aitýynsha, bul sharalar profilaktikalyq jumystyń tiimdiligin arttyryp qana qoimai, azamattar úshin qaýipsiz ortany qalyptastyrýǵa múmkindik beredi.
