Ybyrai Altynsarinniń pedagogikalyq qyzmeti
Ol qazaq balalary úshin zaiyrly mektepter ashýdy armandady. 1860 jyly oblystyq basqarma oǵan Torǵai qalasynda qazaq balalary úshin bastaýysh mektep ashýdy tapsyrdy. Ózi sol mektepte orys tiliniń muǵalimi etip taǵaiyndaldy. Aǵartýshylyq ideialary jigerlendirgen ol aýyl-aýyldy aralap, jergilikti halyqqa bilim alýdyń mańyzy men qajettiligin túsindirýge kúsh saldy. Ondai mektepter ashý úshin qarjy-qarajat jinaýdy qolǵa aldy. Ondai aqshanyń alǵashqy úlesin Y. Altynsarinniń ózi qosty.
Osydan bastap onyń aǵartýshylyq jáne pedagogikalyq qyzmeti bastaldy. 1864 jyly qazaq balalaryna arnalǵan internaty bar mektep saltanatty túrde ashyldy. Úgit jumystarynyń nátijesinde oqýǵa 16 bala jazyldy. Keiinirek bul mektepterdegi oqýshylardyń sany arta bastady. Halyq aǵartýshysy júrgizgen úgit jumystary nátijeli boldy. Bul rette ol bylai dep qýana jazdy: «Ash qasqyrdyń qoiǵa umtylǵany siiaqty, men balalardy oqytýǵa qyzý kiristim jáne meni óte qanaǵattandyratyny — bul balalar áldeqandai ýsh aidyts ishinde oqýdy, tipti jazýdy úirenip aldy».
1879 jyly Y. Altynsarin Torǵai oblysy mektepteriniń inspektory bolyp taǵaiyndaldy. Onyń eńbeginiń arqasynda bilim berý salasy qazaq dalasynda keń oryn aldy. Atap aitqanda, oblystyń barlyq ýezdik qalalarynda ýchilisheler ashý qolǵa alyndy. Ol osy maqsatpen Torǵai oblysynyń qazaq aýyldaryn túgel aralap shyqty. Halyqtan qajetti qarjy jinastyrdy. Sonyń nátijesinde Yrǵyz, Nikolaev, Torǵai jáne Elek ýezderinde eki synyptyq orys-qazaq ýchilishelerin ashty.
Olardy muǵalimdermen jáne oqýshylarmen tolyq qamtamasyz etti. Ol mektepterdiń jabdyqtalýyna, olardyń janynda shaǵyn kitaphanalar uiymdastyrýǵa erekshe kúshti mán berdi. Qazaqstanda qyz balalarǵa bilim berýdiń bastalýy da Y. Altynsarinniń esimimen bailanysty. Asa kórnekti halyq aǵartýshysynyń basshylyǵymen qyz balalarǵa arnalǵan birneshe mektep ashyldy. Ol mektepterdiń janynda internaty boldy. 1886 jyly mektep-internattarda 211 qyz bala oqydy. Y. Altynsarin mektepti halyq aǵartý isiniń mańyzdy býyny sanady.
