Qazaqstan tarihynda alǵash ret sporttyq gimnastikadan olimpiada medalin jeńip alǵan Nariman Qurbanovqa jańa avtokóliktiń kilti tabystaldy, dep habarlaidy Dalanews.kz.
2024 jylǵy Parij Olimpiadasynda kúmis medal jeńip alǵan Qurbanovqa Allur avtomobil kompaniiasy jańa Skoda Kodiaq kóligin syilady. Jeńil atletke kórsetilgen syi-siiapat qazaqstan sport tarihyna qosqan úlesi úshin kórsetilip otyr.
Qurbanov alty jasynan bastap óz ákesiniń qol astynda gimnastikamen ainalysa bastady. Narimannyń ákesi bilgili sportshy ári bapker ekendigin jurt jaqsy biledi. 2017 jyly Nariman tutqaly at ústinde biregei elementti oryndady. Nátijesinde sol element resmi túrde "The Kurbanov" atymen ataldy.
Avtokólikti tapsyrý rásiminde kompaniia ókilderi Qurbanovqa kórsetilip jatqan qurmet — elimizdiń sporttyq jetistikterine qosqan úlesi úshin bildirilgen alǵys ekenin atap ótti.
"Biz Narimandy maqtan tutamyz jáne aldaǵy jetistikterine de qoldaý bildiretin bolamyz. Osy temir tulpar bolashaqtaǵy jańa biik belesterge jetý jolynda senimdi serigi bolady dep úmittenemiz", - dedi Allur kompaniiasynyń ókili Stanislav O- Iýn-Bem.
Sportshy bolsa kompaniia tarapynan jetistikterine qoldaý kórsetip, nazar aýdarǵany úshin zor alǵysyn bildirdi: "Meniń jeńisime otandyq kompaniialar tarapynan rizashylyq bildirip jatqanyna óte qýanyshtymyn. Bul syilyq sporttyq arenada odan ári damýǵa jáne jańa jeńisterge jeteleýge yntalandyratyn bolady".
Esterińizge sala keteiik, Allur kompaniiasy voleiboldan Qazaqstannyń paralimpiadalyq quramasyna JAC Sunray shaǵyn avtobýsyn syiǵa tartqan bolatyn.
