40 myń shaqyrymnan astam jol, 16 óńir jáne qarsylastarǵa jańa úndeý – 15 jáne 16 tamyzdaǵy sailaýaldy naýqan osyndai kórsetkishtermen este qaldy. «Ádilet» kerýeni ekvator uzyndyǵynan da kóp jol júrdi, JSDP «Aýyl» partiiasyna tikelei debatqa shyǵýdy usyndy, al basqa partiialar zaýyttarda, egistik alqaptarynda, klinikalarda, tabiǵi parkter men IT alańdarda sailaýshylarmen bailanys ornatýdy jalǵastyrdy. Sailaýǵa bir apta qalǵanda naýqan óńirlerde ǵana emes, qoǵamdyq-saiasi keńistikte de aiqyn kórine bastady, dep habarlaidy dalanews.kz.
«Ádilet» partiiasy Almatyda qalanyń ǵylymi jáne shyǵarmashylyq ziialy qaýym ókilderimen birqatar kezdesý ótkizdi. Ulttyq ǵylym akademiiasynda ǵalymdar, jazýshylar men mádeniet qairatkerleri ǵylymdy damytý jáne mádeni kodty saqtaý máselelerin talqylady. Farabi IT Hub alańynda IT qaýymdastyq ókilderimen jeke kezdesý ótip, onda jasandy intellektini damytý, tehnologiialyq eksport jáne otandyq ázirleýshilerdi qoldaý máseleleri sóz boldy. Sondai-aq partiia qazaqstandyq ǵalymdardyń Sivers almasynyń jańa surybyn shyǵarý boiynsha jumys istep jatqanyn jáne oǵan «Ádilet» ataýyn berý josparlanǵanyn habarlady.
«Ádiletti Qazaqstan úshin» partiiasynyń mobildi kerýeni aralyq qorytyndysyn jariialady: 23 kún ishinde qatysýshylar 16 óńirdi aralap, 40 myń shaqyrymnan astam jol júrdi. Bul – ekvator uzyndyǵynan da kóp. Kestege sáikes, qalǵan kúnderi kerýen Qostanai, Soltústik Qazaqstan jáne Pavlodar oblystaryndaǵy baǵytyn aiaqtaýy tiis.
Jalpyulttyq sotsial-demokratiialyq partiia Astanada múlik ieleri birlestikteriniń (MIB) qyzmeti jáne turǵyn úi-kommýnaldyq sharýashylyq (TKSh) máseleleri boiynsha forým ótkizdi. Is-shara barysynda turǵyn úi qoryn basqarý jáne baspana ieleriniń múddelerin bildirý máseleleri talqylandy. Kandidat Talǵat Tátikov Ulttyq TKSh palatasyn qurý týraly usynys aitty. Sonymen qatar partiia «Taza jaǵalaý – taza sý aidyny» ekologiialyq is-sharasyn ótkizdi. Oǵan qatysýshylar sý aidyndarynyń biriniń jaǵalaýyn qoqystan tazartyp, aqparattyq taqtaishalar ornatty.
Partiia tóraǵasy Ashat Rahymjanov «Aýyl» partiiasynyń tóraǵasy Qairat Aitýǵanovqa ókilder men deldaldardyń qatysýynsyz, bloger Dinara Sátjannyń alańynda tikelei debat ótkizýdi ashyq usyndy. Buǵan deiin atalǵan alańda JSDP men Qazaqstan Halyq partiiasynyń kóshbasshylary arasynda pikirtalas ótken bolatyn.
«Baitaq» partiiasy «Tabiǵat – ulttyq mura» atty saraptamalyq dóńgelek ústeldiń kezekti kezeńin ótkizdi. Bul joly is-shara «Sharyn» memlekettik ulttyq tabiǵi parkiniń ujymymen uiymdastyrylyp, bioalýantúrlilikti saqtaý, brakonerlikpen kúres jáne ekotýrizmdi damytý máseleleri talqylandy. Kandidat Vladimir Martel Sh. Shókin atyndaǵy Qapshaǵai GES-iniń ujymymen kezdesti. Shamamen 60 adam qatysqan jiynda gidroenergetikany damytý, sý resýrstaryn utymdy paidalaný jáne jańartylatyn energiia kózderiniń róli sóz boldy. Kandidat Alma Qarash plastik qaldyqtar máselesin júieli túrde sheshý qajettigin talqylady. Onyń aitýynsha, mikro jáne nanoplastik adam aǵzasynyń tinderinen de tabylyp jatyr. Al memleket pen biznestiń mindeti – jekelegen óndirýshiler arasynan kinálilerdi izdeý emes, qaldyqtardy qaita óńdeý júiesin qalyptastyrý.
Sondai-aq partiia Astana men Óskemen qalalaryndaǵy meditsina jáne bilim berý salalarynyń ujymdarymen kezdesý ótkizdi. Budan bólek, Mańǵystaý, Jambyl jáne Almaty oblystaryndaǵy aýyl turǵyndary arasynda úgit-nasihat jumystaryn júrgizdi.
Qazaqstan Halyq partiiasy bir kún buryn JSDP tóraǵasymen ótken debattyń qorytyndysyna qatysty pikir bildirdi. QHP tóraǵasy Nursultan Shoqynov eki partiianyń jekelegen ideologiialyq ustanymdarynyń uqsastyǵyn atap ótip, sonymen birge uiymdastyrýshylyq jumys aýqymy men jaqtastarynyń sany boiynsha aiyrmashylyqtarǵa toqtaldy. Ol JSDP-nyń sailaýaldy baǵdarlamasyna jeke toqtalyp, onyń birqatar tarmaǵyn is júzinde júzege asyrý múmkindigine kúmán keltirdi. Sondai-aq Shoqynov Májilistiń ótken shaqyrylymyndaǵy JSDP fraktsiiasynyń qyzmetine toqtalyp, óziniń málimetinshe, osy kezeńde fraktsiia zań qabyldaýǵa bastamashy bolmaǵanyn aitty.
«Aýyl» partiiasy Shymkentte «Qazyǵurt – Ońtústik» kásipornynyń eńbek ujymymen kezdesti. Partiia tóraǵasy Qairat Aitýǵanov kandidattarmen birge munai jáne logistika salalarynyń ókilderimen temirjol tasymalynyń tiimdiligin arttyrý jáne infraqurylymdy jańǵyrtý máselelerin talqylady. Túrkistan oblysynda Aitýǵanov jergilikti diqandarmen beiresmi jaǵdaida – egistik alqabyndaǵy túski as ústinde áńgimelesip, olardyń agrarlyq sektordy damytýǵa qatysty máselelerin tyńdady.
«Aq jol» demokratiialyq partiiasy Almaty, Qostanai, Qaraǵandy, Túrkistan jáne Mańǵystaý oblystaryndaǵy kezdesýlerin jalǵastyrdy. Partiia tóraǵasy Daniia Espaeva elimizdiń ár óńirinen kelgen jekemenshik klinikalardyń basshylary jáne dárigerlermen kezdesti. Qatysýshylar litsenziialaý, qarjylandyrýǵa qol jetkizý jáne meditsinalyq infraqurylymdy damytý máselelerin talqylady. Kezdesý qorytyndysy boiynsha partiia Meditsinalyq investitsiialyq alianspen jáne Meditsinalyq investitsiialyq odaqpen yntymaqtastyq týraly memorandýmǵa qol qoidy.
«Respublica» partiiasy Qostanai oblysyndaǵy qalany jáne 14 aýdandy elektr energiiasymen qamtamasyz etetin «EPK-Forfait» elektr jelilik kompaniiasyna bardy. Ujymmen kezdesý barysynda otandyq óndiristi damytý, sondai-aq óńirlerdegi bilim berý jáne meditsinalyq qyzmetterdiń qoljetimdiligi máseleleri talqylandy. Budan bólek, partiia ókilderi 1974 jyldan beri jumys isteitin jáne ónimniń 300-den astam túrin shyǵaratyn «Baian Sulý» konditerlik fabrikasyna bardy.
Qostanaida jastarmen ReTalks formatynda beiresmi kezdesý jáne partiianyń ReWomen áielder qaýymdastyǵynyń mereitoilyq 20-shy óńirlik forýmy ótti. «Respublica» partiiasynyń málimetinshe, atalǵan qaýymdastyq 22 myńǵa jýyq qatysýshyny biriktiredi. Sonymen qatar partiia Býrabai men Kókshetaýdyń týristik oryndaryn aralaýdy qamtyǵan ReBus úgit-nasihat is-sharasyn ótkizdi.
Sailaýǵa bir apta qalǵanda partiialar eńbek ujymdarymen, biznes jáne sarapshylar qaýymdastyǵynyń ókilderimen kezdesýler ótkizýdi, sondai-aq qoǵamdyq debattarǵa qatysýdy jalǵastyryp jatyr. Sońǵy kúnderi QHP men JSDP ókilderi arasynda debat ótti. Budan bólek, «Aýyl» partiiasy qoǵamdyq pikirtalas ótkizýdi usyndy. Sonymen qatar partiialar óńirlerdegi jumysynyń aýqymyn kórsetýdi jalǵastyrýda. «Ádilet» kerýeni óz baǵytynyń ekvatorynan ótip úlgerse, basqa partiialardyń shtabtary elimizdiń barlyq derlik óńirinde kezdesýler ótkizip jatyr. Naýqannyń qorytyndy aptasy budan da belsendi ótetin syńaily.
