Reseidiń Máskeý oblysyndaǵy Koledino eldi mekeninde ornalasqan Wildberries qoimasynda bolǵan órt saldarynan qazaqstandyq kásipker Aidarhan Qasymbektiń taýarlary órtenip ketken, dep habarlaidy dalanews.kz.
Kásipkerdiń aitýynsha, qoimada saqtalǵan ónimderiniń ózindik quny shamamen 150 million teńge bolǵan.
«Taýarlardyń bári tolyqtai janyp ketti. Árine, bul ońai jaǵdai emes. Buǵan deiin órtengen qoimalarda bizdiń ónimderimiz az mólsherde bolǵan edi. Negizgi taýarlarymyz dál osy Koledino qoimasynda saqtalatyn. Degenmen bári Allanyń qalaýymen boldy dep qabyldaimyz. Bir ai buryn dron shabýyldary bastalǵan kezde bul qoimadaǵy taýarlarymyzdyń quny shamamen 400 million teńgege jetken edi. Keiin olardyń basym bóligin jeńildikpen satyp úlgerdik», – dedi kásipker.
Aidarhan Qasymbek investorlar aldynda bereshegi joq ekenin de atap ótti. Onyń sózinshe, seriktesteri óz úlesterine tiesili taýarlardy aldyn ala satyp úlgergen.
Aita keteiik, 2026 jyldyń shilde-tamyz ailarynda Reseidegi eń iri marketpleisterdiń biri Wildberries-tiń birneshe logistikalyq ortalyǵy men qoimasy dron shabýyldaryna ushyrady. Alǵashqy shabýyldar Máskeý oblysyndaǵy Koledino men Elektrostaldaǵy, sondai-aq Tambov oblysyndaǵy Kotovsk qalasyndaǵy nysandarǵa jasalǵan.
Keiin mundai oqiǵalar Krasnodar jáne Stavropol ólkelerindegi, Sankt-Peterbýrg mańyndaǵy, Leningrad oblysy men Qyrymdaǵy logistikalyq ortalyqtarda da tirkeldi. Reuters jáne ózge de halyqaralyq aqparat quraldarynyń málimetinshe, sońǵy aptalarda Wildberries-tiń ondaǵan qoimasy zaqymdanyp, kompaniianyń logistikalyq infraqurylymynyń edáýir bóligi ýaqytsha jumysyn toqtatqan.
