Atyraýda tórt adamdy óltirgeni úshin ómir boiyna bas bostandyǵynan aiyrylǵan Sultan Sársemálievke qatysty sot úkimi boiynsha apelliatsiialyq shaǵym berildi, dep habarlaidy dalanews.kz.
"Sot kabinetindegi" málimetke sáikes, shaǵym 2026 jylǵy 29 shildede túsken. Alaida Sultan Sársemálievtiń ózi ázirge apelliatsiialyq sot alqasyna júginbegen.
Atyraý oblystyq sotynyń málimetinshe, úkim jariialanǵan kezde sýdia birneshe mekeme basshysyna qatysty jekeshe qaýly shyǵarǵan. Apelliatsiialyq shaǵym sol mekemelerdiń birinen berilgen.
Eske sala keteiik, 2026 jylǵy 14 shildede Sultan Sársemáliev qaiyn jurtyndaǵy tórt adamdy óltirgeni úshin ómir boiyna bas bostandyǵynan aiyrylǵan edi. Sot úkimi ázirge zańdy kúshine engen joq.
Is materialdaryna sáikes, Sársemáliev 2025 jyldyń mamyrynda jaldap turǵan úiinde qaiyn aǵasy Naýryz Muqanǵalievti pyshaqtap óltirgen. Keiin onyń denesin úi mańyna kómip, jaqyndary kúmándanbaýy úshin marqumnyń atynan habarlamalar jazyp otyrǵan.
Sol jyldyń qazanynda ol Jangeldin aýylynda turatyn burynǵy qaiyn atasy men enesin de pyshaqtap óltirgen. Olardyń máiitterin aldyn ala qazylǵan jerge kómgen.
Keiin burynǵy áieli Aqbaian men qaiyn apasy Meiramgúl Qarabalinany Atyraýǵa alyp barǵan. Qalada Meiramgúldi de óltirip, denesin Naýryzdyń janyna kómgen.
Tergeý men sot barysynda Sársemálievtiń adam óltirýden bólek, alaiaqtyq, urlyq, jeke kýálikterdi iemdený, múlikti talan-tarajǵa salý jáne nesie rásimdeý sekildi birqatar quqyq buzýshylyq jasaǵany anyqtalǵan.
Sotta ol jasaǵan áreketterine ókinetinin aitqanymen, bolǵan jaǵdaiǵa marqumdardyń ózin de kinálaǵan.
Qylmystyq isti sýdia Zarema Hamidýllina qaraǵan.
