Ózbekstanda Gúlnara Karimovanyń zańsyz aktivteri qalai qaitarylyp jatqany belgili boldy,- dep habarlaidy Dalanews.kz.
Ózbekstan Shveitsariiada tárkilengen Gúlnara Karimovanyń aktivterinen 95 million dollardy qaitaryp aldy. Qarajat endi áleýmettik saladaǵy jobalarǵa baǵyttalady. Bul týraly "Gazeta.uz" agenttigine BUU qamqorlyǵymen qurylǵan Uzbekistan Vision 2030 senim qory hatshylyǵynyń basshysy Ionas Astrýp aitty.
Bul qarajat Karimovaǵa qarsy Shveitsariiada qozǵalǵan qylmystyq ister nátijesinde qaitarylǵan. Qazirge deiin eki ispen jumys tolyq aiaqtalǵan:
- Birinshi is – 131 million dollarǵa qatysty. Bul is 2022 jyly qyrkúiekte aiaqtalǵan, sol kezde bul qor da qurylǵan.
- Ekinshi is 182 million dollar kólemindegi aktivke qatysty. Ol jýyrda ǵana aiaqtalǵan.
Eki istiń nátijesinde Ózbekstanǵa qaitarylýǵa tiis soma – 313 million dollar, onyń 95 milliony qazirdiń ózinde BUU-nyń Niý-Iorktegi esepshotyna aýdarylǵan.
Qor bul qarajattyń 67 million dollaryn densaýlyq saqtaý jáne bilim berý salasyndaǵy jobalarǵa bólgen. Bul jobalar Ózbekstan halqynyń igiligine baǵyttalǵan.
Ionas Astrýptyń aitýynsha, qor qurylymyn basqa elder de qoldana alady. Sebebi Gúlnara Karimovanyń aktivteri birneshe elde bar. Eger sol memleketter óz aktivterin qaitarý úshin osy qordy paidalanýǵa niet bildirse, Ózbekstan jáne Shveitsariia úkimetterimen kelisilýi kerek. Bul qor Shveitsariiada Karimovaǵa qarsy qozǵalǵan qylmystyq is aiasynda tárkilengen qarajatty ashyq ári ádiletti túrde jumsaý úshin qurylǵan.
Aita keteiik, buǵan deiin Ózbekstan Gúlnara Karimovanyń zańsyz shyǵarylǵan aktivterin qaitaryp jatqany habarlandy.
Ózbekstan úkimeti men Shveitsariianyń federaldyq keńesi “Tárkilengen aktivterdi bólý týraly kelisimge” qol qoiǵany, bul qujat Ózbekstannyń tuńǵysh prezidenti Islam Karimovtyń úlken qyzy Gúlnara Karimovaǵa tiesili shamamen 182 million dollardy qaitarýdy kózdep otyrǵany aityldy.
