Astananyń qylmystyq ister jónindegi aýdanaralyq soty Gúlmira Satybaldyny tórtinshi qylmystyq is boiynsha kináli dep tanydy, dep habarlaidy dalanews.kz.
"Aq Jaiyq" basylymynyń jazýynsha, oǵan buǵan deiin taǵaiyndalǵan 12 jyl bas bostandyǵynan aiyrý jazasy ózgerissiz qaldy. Alaida sottalǵan áielden 8 mlrd teńgeden astam qarajat óndirip alý týraly sheshim shyǵaryldy.
Bul joly Satybaldyǵa aldaý arqyly múliktik zalal keltirý jáne óz betinshe áreket etý boiynsha aiyp taǵylǵan. Is boiynsha jábirlenýshi retinde onyń ápkesiniń burynǵy kúieýi ári burynǵy biznes-seriktesi Abai Júnisov tanylǵan.
Jariialanǵan aqparatqa sáikes, Satybaldy men Júnisov birge kásip júrgizip, Almatydaǵy «Vostochka» turǵyn úi kesheniniń qurylysyna qatysqan. Keiin Júnisov Satybaldymen bailanysty adamdarǵa kompaniialardaǵy úlesterin berip, basqa da qujattarǵa qol qoiǵan.
Aiyptaý nusqasy boiynsha, atalǵan qujattarǵa qysym kórsetý arqyly qol qoiǵyzylǵan. Mihail Kozachkovtyń jazýynsha, er adam birneshe ai boiy Satybaldynyń úiiniń jertólesinde zańsyz ustalǵan.
Turǵyn úiler satylǵannan keiin Júnisovtiń «VTB Bank» aldyndaǵy 8 mlrd teńgeden astam qaryzy qalǵan.
Gúlmira Satybaldy ózine taǵylǵan aiypty moiyndamady. Ol taǵylǵan aiyptyń mánin túsinbeitinin jáne Júnisovtiń bank aldyndaǵy qaryzynyń paida bolýyna óziniń qatysy joq ekenin málimdedi.
Sot Satybaldyny taǵylǵan baptar boiynsha kináli dep tanydy. Buǵan deiin belgilengen 12 jyldyq merzimge qosymsha jaza qosylǵan joq. Degenmen odan 8 mlrd teńgeden astam qarajat óndirip alý týraly sheshim shyǵaryldy.
2023 jyly Gúlmira Satybaldyǵa óz betinshe áreket etý, adam urlaý, múlikti iemdený jáne ysyrap etý isteri boiynsha eki úkim shyǵarylǵan edi. Sol kezde qylmystar jiyntyǵy boiynsha oǵan segiz jyl bas bostandyǵynan aiyrý jazasy taǵaiyndalǵan.
2024 jyly bopsalaý jáne adamdy zańsyz bas bostandyǵynan aiyrý isi boiynsha sottalǵannan keiin onyń túpkilikti jaza merzimi 12 jylǵa deiin uzartyldy.
Jańa sot úkimi ázirge zańdy kúshine engen joq.
