Májilis depýtaty, burynǵy Oqý-aǵartý ministri Ashat Aimaǵambetov memlekettik bilim grantyn ielene almaǵan talapkerlerge áli de joǵary oqý ornyna túsýge jáne grant alýǵa birneshe múmkindik bar ekenin aitty, dep habarlaidy dalanews.kz.
Depýtattyń sózinshe, grant konkýrsynyń nátijesi talapkerdiń bolashaǵyn tolyq anyqtamaidy. Sondyqtan grant uta almaǵan jastarǵa úmit úzbeýge keńes berdi.
Ákimdik pen qorlardyń granttary bar
Ashat Aimaǵambetov aldymen jergilikti atqarýshy organdar bóletin granttarǵa nazar aýdarýǵa shaqyrdy.
Onyń aitýynsha, jyl saiyn ákimdikter jergilikti biýdjet esebinen birneshe myń bilim grantyn usynady. Sonymen qatar «Qazaqstan halqyna» qoǵamdyq qorynyń da arnaiy granttyq baǵdarlamalary bar.
Keibir granttar qaita bólinedi
Depýtat grant iegerleriniń bir bóligi túrli sebeptermen óz grantynan bas tartatynyn atap ótti.
Mundai jaǵdaida bos qalǵan granttar UBT nátijesi boiynsha kelesi úmitkerlerge beriledi.
Aqyly bólimnen grantqa aýysýǵa bolady
Aimaǵambetovtiń aitýynsha, talapkerler aqyly bólimge túsip, oqý barysynda joǵary akademiialyq kórsetkishke qol jetkizý arqyly keiinnen bosaǵan memlekettik grantqa ie bola alady.
Sondai-aq keibir joǵary oqý oryndary ózderiniń ishki granttaryn da usynady.
Gap year múmkindigin paidalanýǵa keńes berdi
Májilis depýtaty bir jyl daiyndalyp, UBT-ny qaita tapsyrý da tiimdi sheshim bolýy múmkin ekenin aitty.
«Gap year arqyly bir jyl daiyndalyp, qaitadan UBT tapsyryp, grantty jeńip alýǵa bolady. Bul – meniń óz basymnan ótken jaǵdai», – dedi ol.
Kolledj de tiimdi joldardyń biri
Ashat Aimaǵambetov kolledjde memlekettik granttardyń kóp ekenin jáne eńbek naryǵynda tehnikalyq mamandarǵa suranys joǵary ekenin eske saldy.
Onyń aitýynsha, kolledj bitirgennen keiin joǵary oqý ornyna túsip, qysqartylǵan baǵdarlama arqyly joǵary bilim alýǵa múmkindik bar.
Depýtat talapkerlerge barlyq múmkindik áli de saqtalǵanyn aityp, tolyq aqparat alý úshin ýniversitetterdiń qabyldaý komissiialaryna júginýge keńes berdi.
