Senat eńbek quqyqtaryn qorǵaýdy kúsheıtýge baǵyttalǵan zańdy qabyldady, dep habarlaıdy Dala News.

Jańa normaǵa sáıkes, azamattyq-quqyqtyq sharttardy (GPH) eńbek qatynastaryn jasyrý úshin paıdalanýǵa tyıym salynady.

Zańda eńbek qatynastarynyń naqty belgileri de kórsetilgen. Atap aıtqanda:
– belgili bir qyzmet nemese mamandyq boıynsha jumys isteý,
– qyzmetkerdiń ishki tártipke baǵynýy,
– eńbekaqynyń jumys nátıjesine emes, prosesine tólenýi.

Osy belgiler bar jaǵdaıda jumys berýshi mindetti túrde eńbek sharty rásimdeýi tıis.

Sonymen qatar zańda birqatar mańyzdy áleýmettik ózgerister qarastyrylǵan. Endi 14 jasqa deıingi balasy bar jalǵyzbasty ata-analardy jumys berýshi óz bastamasymen jumystan shyǵara almaıdy.

Budan bólek, eńbek daýlaryn sheshý kezinde táýelsiz deldal tartý múmkindigi engiziledi, al óndiristegi jazataıym oqıǵalardy tergeý komısıasyna advokat nemese jaqyn týystardy qatystyrýǵa ruqsat beriledi.

Jańa zań jumysshylardyń quqyqtaryn qorǵaýdy kúsheıtip, eńbek qatynastaryn ashyq ári ádil etýge baǵyttalǵan.