Golovkinniń qarsylasyn bapkeri qutqardy

Orta salmaq boiynsha WBA (Super), IBO, WBC jáne IBF chempiondyǵyn qorǵaý jekpe-jegi Londondaǵy 20 myń adam syiatyn O2 Arena kesheninde ótti. Qos boksshy da bul kezdesýge deiin kásipqoi ringte jeńilmegen. Keibir mamandar "Brýk - Golovkinniń karerasyndaǵy eń qaýipti qarsylas" dep baǵalaǵan. Brýk - 36, Golovkin 35 márte jekpe-jekke shyǵyp, barlyǵynda basym túsken. Brýk - 25, Golovkin - 32 qarsylasyn ýaqytynan buryn, aiqyn basymdyqpen jeńgen edi.

Qyrkúiektiń 11-ine qaraǵan túnde ótken kezdesýdi Golovkin birden belsendi bastady. Birinshi raýnd ortasynda ol qarsylasyna birneshe djeb pen hýk soqqy darytyp, jaǵy men baýyrynan uryp úlgerdi. Keiin shabýylyn azaityp, qorǵanysqa kóshkendei boldy. Golovkinniń sál tynyshtalǵanyn baiqaǵan Brýk qarsy shabýyl jasaýǵa tyrysyp, bir márte apperkot soqqysyn dál tigizdi. Biraq Golovkinniń qorǵanysyn buza alǵan joq. Úshinshi raýndty Golovkin birden belsendi bastap, qarsylasynyń betine bes-alty soqqyny dál tigizdi. Aýyr soqqylardan keiin Brýktyń oń kóziniń asty jyrylyp, isip ketti. Tórtinshi raýndta eki jaq ta birneshe márte ońtaily soqqy jasady.

Brýktyń bapkeri Dominik Ingl referiden kezdesýdi toqtatýdy surap turǵan sáti. London. 10 qyrkúiek 2016 jyl.

Al besinshi raýndta Golovkin qarsylasyn bastyrmalatyp ura bastady. Soqqydan kóz ashpaǵan ulybritaniialyq boksshy sharasyz túrde basyn buǵa qorǵanyp jatqan. Osy sátte ring shetinde turǵan Brýktiń bapkeri Dominik Ingl qolyndaǵy oramalyn bulǵap referiden jekpe-jekti toqtatýdy surady. Keiin ol qolyndaǵy oramaldy ringke laqtyrǵanda tóreshi qos qolyn aiqastyra kóterip, kezdesý aiaqtalǵany týraly belgi berdi.

Osylaisha, 34 jastaǵy Gennadii Golovkin orta salmaq dárejesinde(160 fýnt – shamamen 73 kg) WBA (Super), IBO, WBC jáne IBF tujyrymdary boiynsha álem chempiony ataǵyn saqtap qaldy. Al 30 jastaǵy Kell Brýk óz karerasynda alǵash ret jeńildi.

"JATTYǴÝDA JÚRGENDEI SEZINDIM"

Kezdesýden keiin Gennadii Golovkin: "Londonǵa alǵys. Kell menimen kezdesýden jasqanǵan joq. Sol úshin oǵan qurmet. Biraq ol meni esh tań qaldyrǵan joq. Ózimdi jattyǵýda júrgendei sezindim. Men bárine ashyqpyn. Kez-kelgen boksshymen kezdesýge daiynmyn" dedi.

Golovkin men Brýk kezdesýinen kórinis. London. 10 qyrkúiek 2016 jyl.

Al Golovkinniń bapkeri Abel Sanches Brýkti bapkerleriniń qutqaryp qalǵanyn “durys sheshim” dep baǵalady.

Kezdesýden keiin Kell Brýk "Ekinshi-úshinshi raýndta qatty soqqy tidi. Bul kezdesýde tolyq ashyla almadym. Besinshi raýndta soqqy jasap jatqanda kóz aldymda birneshe Golovkin júrdi. Degenmen, men onymen taǵy da jekpe-jekke shyǵýǵa daiynmyn. Men ringke qaita oralamyn" dedi.

Osy jekpe-jek úshin Golovkin men Brýktyń árqaisysy úsh million fýnt sterling (4 million dollardan astam) gonorar aldy. Bul - eki boksshynyń karerasyndaǵy rekordtyq syiaqy.

Kezdesý aldyndaǵy salmaq ólsheý rásiminen keiin ulybritaniialyq Sky Sports basylymy "Golovkin jańa oianǵandai kórindi. Birde-bir ret kúlgen joq. Onyń densaýlyǵynda kinárat bar siiaqty. Brýk úshin jeńiske jetýge múmkindik bar" dep jazǵan. Al Brýk: "Golovkinniń kózinen qorqynysh kórdim. Ol meniń aldymda ózin jaisyz sezindi" degen edi. Golovkinniń ózi salmaq ólsheý rásiminen keiin jýrnalisterge suhbat berýden bas tartqan. Alaida Golovkinniń proýmoýteri Abel Sanches: "Golovkinniń jaǵdaiy jaqsy. Ol tek Brýkke sál bolsa da ashylyp sóileýge múmkindik berdi. Kezdesýde ol birinshi minýttan bastap jumysyn isteidi" dep jaýap bergen.

Golovkin Brýkpen kezdespes buryn WBC tujyrymy boiynsha álem chempiony meksikalyq Saýl Alvarespen jekpe-jek ótkizýi tiis edi. Biraq Alvares kezdesýden bas tartyp, óz erkimen WBC chempiondyq belbeýin Golovkinge berdi. Golovkin orta salmaqta álemniń absoliýt chempiony bolý úshin WBO tujyrymy boiynsha álem chempiony ataǵy jetispeidi. Bul ataq ulybritaniialyq Billi Djo Sonderske tiesili. Qazaqstandyq kásipqoi boksshy osyǵan deiin Sondrespen kezdesýge tolyq daiyn ekenin birneshe ret málimdegen. Biraq ulybritaniialyq boksshy ázirge jaýap bergen joq.

Rýslan Medelbek

Derekkóz: "Azattyq" saity