ورتا سالماق بويىنشا WBA (Super)، IBO، WBC جانە IBF چەمپيوندىعىن قورعاۋ جەكپە-جەگى لوندونداعى 20 مىڭ ادام سىياتىن O2 Arena كەشەنىندە ءوتتى. قوس بوكسشى دا بۇل كەزدەسۋگە دەيىن كاسىپقوي رينگتە جەڭىلمەگەن. كەيبىر ماماندار "برۋك - گولوۆكيننىڭ كارەراسىنداعى ەڭ ءقاۋىپتى قارسىلاس" دەپ باعالاعان. برۋك - 36، گولوۆكين 35 مارتە جەكپە-جەككە شىعىپ، بارلىعىندا باسىم تۇسكەن. برۋك - 25، گولوۆكين - 32 قارسىلاسىن ۋاقىتىنان بۇرىن، ايقىن باسىمدىقپەن جەڭگەن ەدى.

قىركۇيەكتىڭ 11-ىنە قاراعان تۇندە وتكەن كەزدەسۋدى گولوۆكين بىردەن بەلسەندى باستادى. ءبىرىنشى راۋند ورتاسىندا ول قارسىلاسىنا بىرنەشە دجەب پەن حۋك سوققى دارىتىپ، جاعى مەن باۋىرىنان ۇرىپ ۇلگەردى. كەيىن شابۋىلىن ازايتىپ، قورعانىسقا كوشكەندەي بولدى. گولوۆكيننىڭ ءسال تىنىشتالعانىن بايقاعان برۋك قارسى شابۋىل جاساۋعا تىرىسىپ، ءبىر مارتە اپپەركوت سوققىسىن ءدال تيگىزدى. ءبىراق گولوۆكيننىڭ قورعانىسىن بۇزا العان جوق. ءۇشىنشى راۋندتى گولوۆكين بىردەن بەلسەندى باستاپ، قارسىلاسىنىڭ بەتىنە بەس-التى سوققىنى ءدال تيگىزدى. اۋىر سوققىلاردان كەيىن برۋكتىڭ وڭ كوزىنىڭ استى جىرىلىپ، ءىسىپ كەتتى. ءتورتىنشى راۋندتا ەكى جاق تا بىرنەشە مارتە وڭتايلى سوققى جاسادى.

برۋكتىڭ باپكەرى دومينيك ينگل رەفەريدەن كەزدەسۋدى توقتاتۋدى سۇراپ تۇرعان ءساتى. لوندون. 10 قىركۇيەك 2016 جىل.

ال بەسىنشى راۋندتا گولوۆكين قارسىلاسىن باستىرمالاتىپ ۇرا باستادى. سوققىدان كوز اشپاعان ۇلىبريتانيالىق بوكسشى شاراسىز تۇردە باسىن بۇعا قورعانىپ جاتقان. وسى ساتتە رينگ شەتىندە تۇرعان برۋكتىڭ باپكەرى دومينيك ينگل قولىنداعى ورامالىن بۇلعاپ رەفەريدەن جەكپە-جەكتى توقتاتۋدى سۇرادى. كەيىن ول قولىنداعى ورامالدى رينگكە لاقتىرعاندا تورەشى قوس قولىن ايقاستىرا كوتەرىپ، كەزدەسۋ اياقتالعانى تۋرالى بەلگى بەردى.

وسىلايشا، 34 جاستاعى گەنناديي گولوۆكين ورتا سالماق دارەجەسىندە(160 فۋنت – شامامەن 73 كگ) WBA (Super)، IBO، WBC جانە IBF تۇجىرىمدارى بويىنشا الەم چەمپيونى اتاعىن ساقتاپ قالدى. ال 30 جاستاعى كەلل برۋك ءوز كارەراسىندا العاش رەت جەڭىلدى.

"جاتتىعۋدا جۇرگەندەي سەزىندىم"

كەزدەسۋدەن كەيىن گەنناديي گولوۆكين: "لوندونعا العىس. كەلل مەنىمەن كەزدەسۋدەن جاسقانعان جوق. سول ءۇشىن وعان قۇرمەت. ءبىراق ول مەنى ەش تاڭ قالدىرعان جوق. ءوزىمدى جاتتىعۋدا جۇرگەندەي سەزىندىم. مەن بارىنە اشىقپىن. كەز-كەلگەن بوكسشىمەن كەزدەسۋگە دايىنمىن" دەدى.

گولوۆكين مەن برۋك كەزدەسۋىنەن كورىنىس. لوندون. 10 قىركۇيەك 2016 جىل.

ال گولوۆكيننىڭ باپكەرى ابەل سانچەس برۋكتى باپكەرلەرىنىڭ قۇتقارىپ قالعانىن “دۇرىس شەشىم” دەپ باعالادى.

كەزدەسۋدەن كەيىن كەلل برۋك "ەكىنشى-ۇشىنشى راۋندتا قاتتى سوققى ءتيدى. بۇل كەزدەسۋدە تولىق اشىلا المادىم. بەسىنشى راۋندتا سوققى جاساپ جاتقاندا كوز الدىمدا بىرنەشە گولوۆكين ءجۇردى. دەگەنمەن، مەن ونىمەن تاعى دا جەكپە-جەككە شىعۋعا دايىنمىن. مەن رينگكە قايتا ورالامىن" دەدى.

وسى جەكپە-جەك ءۇشىن گولوۆكين مەن برۋكتىڭ ءارقايسىسى ءۇش ميلليون فۋنت ستەرلينگ (4 ميلليون دوللاردان استام) گونورار الدى. بۇل - ەكى بوكسشىنىڭ كارەراسىنداعى رەكوردتىق سىياقى.

كەزدەسۋ الدىنداعى سالماق ولشەۋ راسىمىنەن كەيىن ۇلىبريتانيالىق Sky Sports باسىلىمى "گولوۆكين جاڭا ويانعانداي كورىندى. بىردە-بىر رەت كۇلگەن جوق. ونىڭ دەنساۋلىعىندا كىنارات بار سياقتى. برۋك ءۇشىن جەڭىسكە جەتۋگە مۇمكىندىك بار" دەپ جازعان. ال برۋك: "گولوۆكيننىڭ كوزىنەن قورقىنىش كوردىم. ول مەنىڭ الدىمدا ءوزىن جايسىز سەزىندى" دەگەن ەدى. گولوۆكيننىڭ ءوزى سالماق ولشەۋ راسىمىنەن كەيىن جۋرناليستەرگە سۇحبات بەرۋدەن باس تارتقان. الايدا گولوۆكيننىڭ پروۋموۋتەرى ابەل سانچەس: "گولوۆكيننىڭ جاعدايى جاقسى. ول تەك برۋككە ءسال بولسا دا اشىلىپ سويلەۋگە مۇمكىندىك بەردى. كەزدەسۋدە ول ءبىرىنشى مينۋتتان باستاپ جۇمىسىن ىستەيدى" دەپ جاۋاپ بەرگەن.

گولوۆكين برۋكپەن كەزدەسپەس بۇرىن WBC تۇجىرىمى بويىنشا الەم چەمپيونى مەكسيكالىق ساۋل الۆارەسپەن جەكپە-جەك وتكىزۋى ءتيىس ەدى. ءبىراق الۆارەس كەزدەسۋدەن باس تارتىپ، ءوز ەركىمەن WBC چەمپيوندىق بەلبەۋىن گولوۆكينگە بەردى. گولوۆكين ورتا سالماقتا الەمنىڭ ابسوليۋت چەمپيونى بولۋ ءۇشىن WBO تۇجىرىمى بويىنشا الەم چەمپيونى اتاعى جەتىسپەيدى. بۇل اتاق ۇلىبريتانيالىق بيللي دجو سوندەرسكە تيەسىلى. قازاقستاندىق كاسىپقوي بوكسشى وسىعان دەيىن سوندرەسپەن كەزدەسۋگە تولىق دايىن ەكەنىن بىرنەشە رەت مالىمدەگەن. ءبىراق ۇلىبريتانيالىق بوكسشى ازىرگە جاۋاپ بەرگەن جوق.

رۋسلان مەدەلبەك

دەرەككوز: "ازاتتىق" سايتى