Mańǵystaý aýdanynyń ortalyǵy Shetpe aýylynda Airaqty taýy aimaǵynda vizit ortalyǵyn salý boiynsha qoǵamdyq tyńdaý ótti,– dep habarlaidy Dalanews.kz
Sharaǵa máslihat depýtattary, ardagerler, azamattyq qoǵamnyń ókilderi men tabiǵat janashyrlary jáne sarapshylar qatysty.
Memleket basshysy Qasym-Jomart Toqaev Úkimettiń keńeitilgen otyrysynda týrizm ekonomikanyń ósýine jańasha serpin beretin sala bolýy qajet ekenin basa aitty. Prezidenttiń týrizmdi damytýǵa qatysty tapsyrmasyna sáikes, óńirde jańa jobalardy júzege asyrý josparlanyp otyr.
Zańǵa sáikes ótkizilgen qoǵamdyq tyńdaý barysynda Mańǵystaýdyń kórikti jerleriniń biri – Airaqty taýynyń aimaǵynda vizit-ortalyqtary, sondai-aq týrister men jergilikti turǵyndar úshin jaǵdaidy jaqsartýǵa baǵyttalǵan basqa infraqurylymdyq nysandardyń qurylysyn júrgizý máseleleri talqylandy.
Jobanyń maqsaty – týristerge qolaily ári jaily keńistik qalyptastyrý. Ortalyq qonaqtarǵa aimaqtyń erekshe tabiǵatymen tolyǵyraq tanysýǵa jol ashyp, kóshpendilerdiń dástúrli mádenietiniń rýhyn sezinýge múmkindik beredi. Oǵan qosa, qorshaǵan ortany meilinshe uqypty paidalaný kózdeledi.
Joba boiynsha Airaqty taýy jotasynyń eteginde 15 geokýpoldy shatyrdan turatyn glempingter, etno aýyl men shaihana jáne meiramhana salynady. Bul nysandardyń barlyǵy otandyq investordyń jeke qarajaty esebinen júrgiziledi.
Joba avtorlarynyń aitýynsha, bul vizit ortalyǵy óńir ekonomikasynyń ilgerileýine jáne ishki, sheteldik saiahattaýshylardyń sanyn arttyrýǵa jol ashady. Sonymen qatar, jergilikti turǵyndardyń kásip ashýyna, óz ónimderin satyp, tabys tabýyna múmkindik beredi. Joba sátti júzege asqan jaǵdaida 50-den astam jańa turaqty jumys orny ashylady.
Qoǵamdyq tyńdaýǵa qatysýshylar júzege asqaly otyrǵan jańa týristik nysannyń aýdan turǵyndaryna berer paidasy mol ekenin aitty.
«Airaqtyda qonaq úi salynady degen jańalyqqa qýanyp otyrmyz. Sebebi, bizde sharýashylyqpen otyrǵan aýyldar kóp. Eger kelgen týristerge sol aýyldyń, sol malshynyń túiesiniń shubatyn, etinen beshbarmaq, bujy jasap ótkizip otyrsa, qarapaiym malshynyń da tabysy kóbeier edi. Jańa jumys oryndary ashylady. Aýyl taksisteriniń de tabys tabýyna múmkindik týady. Jobany biraýyzdan qoldaimyz»,- dedi turǵyndar.
Jiyn qorytyndysy boiynsha joba turǵyndar tarapynan bir aýyzdan qoldaý tapty.
