Germaniianyń Shvedt qalasyndaǵy munai óńdeý zaýyty 2026 jylǵy 1 mamyrdan bastap qazaqstandyq munaidyń ornyna Ońtústik Amerikadan jetkiziletin munaidy óńdeýge kóshti, dep habarlaidy dalanews.kz.
FBRK dereginshe, bul ózgeris Qazaqstan munaiynyń "Drýjba" munai qubyry arqyly Germaniiaǵa tranzitiniń toqtatylýynan keiin oryn aldy.
Jetkizý baǵyty ózgerdi
"Qazaqstannyń munaiy men gazy" Telegram arnasynyń málimetinshe, Polshanyń Unimot energetikalyq tobyna qarasty kompaniia munaidyń teńiz arqyly jetkizilgen partiiasyn Gdansk portyna qabyldaǵan. Keiin shikizat Polshanyń PERN kompaniiasyna tiesili qubyr júiesi arqyly Germaniiadaǵy Shvedt munai óńdeý zaýytyna jóneltiledi.
Unimot kompaniiasynyń habarlaýynsha, zaýytqa jetkizilgen munai Ońtústik Amerikadan satyp alynǵan.
Qazaqstan munaiynyń tranziti nege toqtady?
Buǵan deiin PERN kompaniiasy Belarýs shekarasynan Germaniianyń Shvedt qalasyna deiin Qazaqstan munaiyn tasymaldap kelgen. Alaida 2026 jylǵy 1 mamyrdan bastap Reseidiń «Transneft» kompaniiasy «Drýjba» munai qubyry arqyly Qazaqstan munaiynyń osy baǵyttaǵy tranzitin toqtatty.
Resmi túrde buǵan «tehnikalyq múmkindiktiń joqtyǵy» sebep bolǵany aityldy. Resei Úkimeti tóraǵasynyń orynbasary Aleksandr Novak ta tranzittiń toqtatylýyn tehnikalyq múmkindiktermen bailanystyrdy.
Onyń aitýynsha, 1 mamyrdan bastap Germaniiaǵa jóneltilip kelgen qazaqstandyq munaidyń kólemi basqa qoljetimdi eksporttyq baǵyttarǵa qaita bólingen.
Buǵan deiin ne belgili boldy?
2026 jyldyń sáýirinde Qazaqstan munaiynyń Resei aýmaǵy arqyly ótetin «Drýjba» munai qubyrynyń soltústik tarmaǵymen Germaniiaǵa tasymaly 1 mamyrdan bastap toqtaityny belgili bolǵan edi.
Keiin Energetika ministri Erlan Aqkenjenov mamyr aiyna arnalǵan jetkizý kestesinde bul baǵyt boiynsha tranzit kólemi nólge teń ekenin málimdedi.
Osyǵan bailanysty Energetika ministrligi 260 myń tonna munaidy balama eksporttyq baǵyttarǵa qaita bólgenin habarlady. Onyń ishinde 100 myń tonnasy Ýst-Lýga porty arqyly, al 160 myń tonnasy Kaspii qubyr konsortsiýmy (KQK) júiesimen eksporttalýda.
