Ǵalymdar Jer halqynyń sanyn 2200 jylǵa qarai shamamen 4 mlrd adamǵa deiin tabiǵi jolmen qysqartý qorshaǵan ortaǵa túsetin júktemeni azaitýy múmkin degen stsenariidi usyndy, dep habarlaidy dalanews.kz.
Zertteý Sustainability ǵylymi jýrnalynda jariialanǵan. Avtorlardyń pikirinshe, halyq sanynyń birtindep azaiýy kómirqyshqyl gazy shyǵaryndylaryn, energiia tutynýdy, tabiǵi resýrstardy paidalanýdy jáne plastik óndirisin tómendetýge yqpal etýi múmkin.
Sonymen qatar zertteý avtorlary másele tek halyq sanyna ǵana emes, ár adamnyń tutyný deńgeiine de bailanysty ekenin atap ótken. Olardyń pikirinshe, ekologiialyq turaqtylyqqa qol jetkizý úshin shamadan tys tutynýdy qysqartý da mańyzdy.
Ǵalymdar sóz bolyp otyrǵan stsenariidiń májbúrli týý shekteýlerin qarastyrmaitynyn erekshe atap ótti. Olar áielderdiń bilim alýyna, otbasyn josparlaý qyzmetterine jáne kontratseptsiiaǵa qoljetimdilikti keńeitýdi usynady. Bul adamdarǵa bala sanyn óz erkimen josparlaýǵa múmkindik beredi.
Zertteýde 4 mlrd adam kórsetkishi ǵylymi turǵydan belgilengen shekti meje emes ekeni aitylǵan. Avtorlar muny XXI ǵasyrdyń sońynan keiingi kezeńge arnalǵan yqtimal uzaq merzimdi stsenariilerdiń biri retinde qarastyrady.
Sonymen birge bul tujyrym ǵylymi ortada pikirtalas týdyrdy. Synshylar halyq sanynyń aitarlyqtai qysqarýy eńbek resýrstarynyń azaiýyna, halyqtyń qartaiýyna jáne zeinetaqy men densaýlyq saqtaý júiesine qosymsha salmaq túsýine ákelýi múmkin ekenin alǵa tartady.
