Resei biligi Qara teńizdegi negizgi porttardan sheteldik tankerlerdiń munai tieýine ýaqytsha tyiym saldy. Bul týraly salanyń eki derekkózi habarlady. Jańa erejeler Qazaqstan munaiynyń eksportyn is júzinde buǵattaýy múmkin. Óitkeni Qazaqstan shikizatynyń 80%-dan astamyn tasymaldaityn Kaspii qubyr konsortsiýmy (KQK) eksportty Reseidiń Novorossiisk portyndaǵy Ońtústik Ozereevka terminaly arqyly júrgizedi, dep habarlaidy Dalanews.kz.
Reuters agenttiginiń esepteýinshe, Resei porttaryna sheteldik kemelerdiń kirýine shekteý qoiýy álemdik munai jetkiziliminiń 2%-dan astamyna áser etýi yqtimal. Shekteýdiń Qazaqstan munaiynan bólek, Reseidiń óz eksportyna da saldary bar.
Bul sheshim Eýroodaqtyń Reseige qarsy jańa sanktsiialarynan keiin birneshe kún ótken soń qabyldandy. Sanktsiialardyń bir bóligi amerikalyq energetikalyq alyptar Chevron men ExxonMobil kompaniialarynyń úlesi bar Kaspii qubyr konsortsiýmyna tikelei áser etken edi.
Osy aptanyń dúisenbisinde Resei prezidenti Vladimir Pýtin sheteldik kemelerdiń Resei porttaryna kirýi úshin endi Federaldyq qaýipsizdik qyzmetiniń (FSB) arnaiy ruqsatyn talap etetin zańǵa qol qoidy. Iaǵni, budan bylai sheteldik kemeler port ákimshiliginen bólek, burynǵy KGB-nyń jalǵasy bolyp sanalatyn FSB-dan da ruqsat alýy tiis. Zań kúshine birden endi.
Kaspii qubyr konsortsiýmy jáne Resei kólik ministrligi bul jaǵdaiǵa túsinikteme berýden bas tartty. Salalyq derekkózderdiń biri másele bir-eki kún ishinde sheshiledi dep sanaidy.
Biyl tamyz aiynda KQK arqyly Qara teńiz portynan Black Sea CPC Blend markaly munai eksporty táýligine 1,66 mln barrel nemese 6,5 mln tonna deńgeiinde josparlanǵan edi. Bul shilde aiyndaǵy josparmen shamalas. Al Novorossiisk arqyly shilde aiynda tranzittelgen munai kólemi shamamen 2,2 mln tonnany quraǵan.
Sońǵy kúnderi munai naryǵynda turaqsyzdyq baiqalady. Buǵan deiin Jerorta teńizi aimaǵyndaǵy treiderler Túrkiianyń Djeihan portyndaǵy ázerbaijandyq BTC munaiynyń lastaný qaýpine bailanysty da alańdaýly bolǵan edi.
Aita keteiik, biyl aqpanda KQK-nyń nasostyq stantsiiasyna dron shabýyly jasalǵan degen kúdikpen eksportqa ýaqytsha kedergi týyndaǵan. Al sáýir aiynda Resei KQK-nyń Qara teńiz terminalynyń ótkizý qabiletin ýaqytsha shektegen bolatyn.
