Qarjy ministriniń orynbasary Erjan Birjanov Freedom Bank klientteri alǵan keshbekterin nege deklaratsiialaýy tiis ekenin túsindirdi. Sóitse keshbektiń ózine salyq salynbaidy eken, biraq ony alýshylar deklaratsiia tapsyrýǵa mindetti ári ony jasaý óte ońai kórinedi, dep habarlaidy Dalanews.kz.
Senat dálizinde jýrnalisterge bergen suqbatynda ol bankten shot ashpas buryn Freedom klientteri kelisimge otyryp, qujatqa qol qoiatynyn eske saldy.
"Osy kelisimge sáikes brokerlik kelisimshart ashylady jáne ondaǵy somalar baǵaly qaǵazdarǵa teńestiriledi. Eger baǵaly qaǵazdardy alsaq, olar boiynsha ósim bolǵanda, bul týraly jalpyǵa birdei deklaratsiialaý týraly zańnamaǵa sáikes mindetti túrde deklaratsiia ótkizilýi qajet, iaǵni 270-nysandy tapsyrady. Biraq, birden aita keteiin, bul ósimge salyq salynbaidy. Biz, tek alynǵan tabysty kórgimiz kelemiz jáne osy deklaratsiiada alynǵan tabys kórsetiledi, biraq oǵan salyq salynbaidy", – dedi Birjanov.
Onyń málimetteri boiynsha, 2024 jyly keshbek alǵan adamdar osy jyldyń 15 qyrkúiegine deiin deklaratsiia tapsyrýy kerek. Bul rette ol jeke tulǵalar jalpyǵa birdei deklaratsiialaýdyń tórtinshi kezeńinen bosatylatynyn eske saldy. Biraq Freedom Bank klientteri jeke tulǵalar bola tura, alǵan tabystary týraly esep berýge mindetti bolady.
"Óitkeni bul kirister baǵaly qaǵazdardaǵydai júredi, mehanizmi sondai, bul klienttiń tańdaýy, ol arada Freedom-ǵa júgingen soń, úlken keshbek bolady, úlken paiyzdar júredi. Álbette, deklaratsiiany tapsyrý kerek. Meniń oiymsha, deklaratsiiany tapsyrý sonshalyqty qiyn dúnie emes, ásirese bul tabysqa salyq salynbaidy, tek kiris kórsetiledi, oń aiyrmasy ǵana. Deklaratsiiany tapsyrý isi avtomattandyrylǵan, deklaratsiialardyń 100%-ǵa jýyǵy onlain-rejimde tapsyrylady. Memlekettik kirister organdaryna kelý, kezek kútý degen sekildi problema joq. Búginderi ony barlyq azamat onlain rejimde tapsyrýda", - dedi Birjanov.
