Qazaq handyǵynyń 550 jyldyq torqaly toıy bıylǵy aıtýly is-sharalardyń negizi bolǵany sózsiz. Jyl basynan beri taǵylymǵa toly kóptegen is-sharalar elimizdiń túkpir-túkpirinde uıymdastyryldy. Jastarymyz tamyryn tereńge tartqan taram-taram tarıhymyzdan taǵylym túıip, el bolyp uıysýdyń mańyzyn túsine túskeni anyq. Taıaýda Qazaq handyǵynyń 550 jyldyq mereıli toıy IýNESKO-nyń Parıj qalasynda ornalasqan shtab-páterinde joǵary deńgeıde atalyp ótti.

Aıtýly sharanyń ótýine  halyqaralyq «Konkord» akademıasy, «Alash» ǵylymı-zertteý ortalyǵy men halyqaralyq  «Adam kapıtaly ınstıtýtynyń» uıytqy bolǵanyn aıta ketýimiz kerek. Shara barysynda «Qazaq handyǵyna 550 jyl» taqyrybynda ǵylymı-kópshilik konferensıa bolyp, belsendi tarıhshy mamandar baıandama jasap, fransýzdarǵa qazaqtardyń kóneden kele jatqan halyq ekenin pash etti. Jıyn barysyn halyqaralyq «Konkord» akademıasynyń prezıdenti G.V.Tomskıı myrza kirispe sózben ashty. Qazaqstannyń Fransıadaǵy elshiliginiń  jaýapty qyzmetkeri, elshiliktiń IýNESKO-daǵy  ókili Satybaldy Burshaqov bul halyqaralyq konferensıanyń mańyzdylyǵyna toqtaldy. Elshiliktiń Parıj qalasyndaǵy konsýly Ǵabıt Sydyqbekov  Qazaq handyǵynyń 550 jyldyǵyna baılanysty Elbasy Nursultan Nazarbaevtyń quttyqtaýyn oqyp berdi.

Kórnekti memleket jáne qoǵam qaıratkeri, tarıhshy Haırolla Ǵabjalılov mundaı is-sharalar elimizdiń abyroı-bedelin kóterýge yqpal etetinin alǵa tartty. Al sharaǵa qatysqan qazaqstandyq maıtalman sportshy Erlan Alshynbaev Qazaq handyǵynyń 550 jyldyq mereıtoıy qazaq jastarynyń potrıottyq sezimin oıatatynyn alǵa tartty.

– Qazaq handyǵynyń 550 jyldyq mereıtoıynyń memlekettik deńgeıde toılanýy jastar úshin tárbıelik máni zor úlken is-shara boldy dep esepteımin. Sondaı-aq, barsha qazaq balasy úshin mańyzy zor is-sharanyń ózge elderde atalynyp ótýi dúnıejúzine tarydaı shashylǵan qandastarymyzdy birlikke shaqyryp, Uly dala tósinde Máńgilik el qurýǵa negiz bolyp otyrǵanyn aıtqym keledi. Fransıadaǵy qazaq dıasporalary Qazaq handyǵynyń 550 jyldyq mereıtoıyn memlekettik deńgeıde toılaýy – olardyń júrek túkpirinde jatqan elge degen saǵynyshty oıatqanyn baıqadym. Sondyqtan aıtýly mereke Táýelsiz Qazaqstannyń birligin arttyryp, irgesin bekemdeı tústi dep esepteımin, – dep aptal azamat ózimen birge ala barǵan Elbasy Nursultan Nazarbaevtyń kitaptaryn Fransıadaǵy qazaqtarǵa tabys etti.

Al Fransıanyń Pálma syılyǵynyń ıegeri, QR Beıbitshilik pen kelisim syılyǵynyń laýreaty, qurmetti profesor Albert Fıshler Qazaqstannyń halyqaralyq bedeli ósip kele jatqandyǵyna toqtalyp,  Qazaqstan Prezıdenti N.Nazarbaevtyń bastamasymen  ár úsh jyl saıyn Astanada Álemdik dinder kóshbasshylarynyń samıti ótetindigin úlgi alarlyq oqıǵa retinde atap ótti.

Konferensıanyń negizgi jumys bóliginde  tarıhshy-ǵalym «Qaınar» ýnıversıtetiniń rektory Erenǵaıyp Omarov  «Qazaq órkenıetiniń damýy men qalyptasý tarıhy», Tarıh jáne etnologıa ınstıtýtynyń bas ǵylymı qyzmetkeri, tarıh ǵylymdarynyń doktory Kenje Torlanbaeva «Qazaq handyǵynyń qalyptasý kezeńderi», «Alash» tarıhı-zertteý ortalyǵynyń  prezıdenti Haırolla Ǵabjálelov «Kóne dáýirden bergi qazaq memlekettiliginiń damý kezeńderi»,  halyqaralyq «Adam kapıtaly ınstıtýtynyń» dırektory Januzaq Ákim «Qazaqtyń etnıkalyq tarıhy» (40 tomdyǵynyń) «Máńgilik El» ıdeıasyn damytýdaǵy  róli», profesor  Grıgorıı Tomskıı «Eýropadaǵy ǵundar tarıhy men táńirshildik»,  respýblıkalyq «Prezıdent jáne Halyq» gazetiniń bas redaktory, profesor Marat Toqashbaev «Qańly jazýy – Qazaq órkenıetiniń  dáleli», Kenesary han qorynyń dırektory Muhtarhan Abaǵan «Qazaq handyǵy  – qazaq halqynyń HÚ-HÚİ  ǵasyrlarda qanat jaıǵan uly memleketi», Ǵabıden Jákeı «Júl Vernniń «Patshanyń shabarmany» romanyndaǵy Kenesary han obrazy», jýrnalıs-zertteýshi Aqmaral Erkinbaeva «Qazaq handyǵynyń qurylý kezeńderi» degen taqyryptarda  baıandamalar jasady.

 Qazaq tilinde jasalǵan baıandamalar sınhrondy túrde fransýz tiline aýdarylyp otyrdy. IýNESKO janynda shyǵatyn halyqaralyq  «Konkord» jýrnalynyń bir sany túgeldeı Qazaq handyǵynyń 550 jyldyǵyna baılanysty osy konferensıa materıaldaryn jarıalaýǵa arnalatyn boldy.  Fransýz basylymdarynyń  jazýyna qaraǵanda jalpy  Qazaq handyǵynyń 550 jyldyǵyna arnalyp  IýNESKO-da ótkizilgen konferensıa Qazaqstan Prezıdenti Nursultan Nazarbaevtyń Fransıaǵa resmı saparymen tustas  asa mańyzdy is-shara retinde atalyp ótilgen.