ForteBank qoldaýymen álemdik alty bestseller qazaq tiline aýdarylyp, 3 myń danamen jaryq kórdi, dep habarlaidy Dalanews.kz.
Táýelsizdik kúni qarsańynda Petropavl qalasyndaǵy Qyzyljar Creative Center ortalyǵynda “Aýylǵa kitap” jobasy aiasynda álemge tanymal 6 kitaptyń qazaqsha nusqasy tanystyryldy. Bul aýqymdy jobaǵa ForteBank qarjylai demeýshilik jasap, “Mazmundama” baspasymen birlese otyryp, tańdaýly shyǵarmalardy qazaqsha sóiletti. Jalpy tirajy – 3 myń dana. Onyń 1000 danasy Soltústik Qazaqstan oblysyndaǵy mektepter men oqý oryndaryna tegin taratyldy.
Aýdarylǵan týyndylar – The New York Times bestsellerler tizimine engen, álemniń ár túkpirinde moiyndalǵan kitaptar. Atap aitqanda: Djordan Pitersonnyń “Ómirdiń 12 erejesi”, Daron Adjemoglý men Djeims Robinsonnyń “Memleketter nege damymai qalady”, Toni Sheidiń “Qýanysh syilaý”, Saimon Sinektiń “Nege degen suraqtan bastańyz”, Frenk Gerberttiń áigili “Qumbel” romany, Rid Hastings pen Erin Meierdiń “Erejesiz ereje. Netflix jáne erekshe basqarý mádenieti”.
“ForteBank bul joba arqyly jastarymyzdyń kókjiegin keńeitetin, olardy jańa ideialar men jetistikke bastaityn kitaptardy ana tilimizde usynýdy maqsat etti. Álemdik deńgeidegi týyndylar qazaq jastarynyń shyǵarmashylyq áleýetin arttyryp, óz salalarynda kóshbasshy bolýǵa jiger beredi dep senemiz. Soltústik Qazaqstan oblysy – kitaptardy alǵash jetkizgen óńir. Jas urpaqtyń qazaq tilindegi zamanaýi ádebietke degen qyzyǵýshylyǵynyń artýy qýantady. Bul bizdi osyndai igi bastamalardy jalǵastyrýǵa shabyttandyrady”, — deidi ForteBank basqarma tóraǵasy Talǵat Qýanyshev.
Is-sharaǵa oblys ákiminiń orynbasary Júsip Jumaǵulov, mektep direktorlary men bilim salasynyń ardagerleri qatysty. Óz sózinde Júsip Jumaǵulov: “Bul kitaptardy orys tilinde oqyp edim, endi qazaqsha nusqasymen tanysýǵa asyqpyn. Muǵalimder men stýdentter bul eńbekterdi zor qyzyǵýshylyqpen oqyp, jańa ideialar men kásibi damýǵa jol tabary sózsiz” dep pikir bildirdi.
“Ár kitaptyń boiynda tereń danalyq, shabyt pen ómirlik suraqtarǵa jaýaptar bar. Bul shyǵarmalar oqýshylarǵa ǵana emes, muǵalimderge de úlken paidasyn tigizedi. Literatýra – adamdy tanýǵa, álemdi uǵynýǵa jeteleitin qundy qazyna”, — dedi ardager ustaz Saýle Kereeva.
Jalpy, ForteBank demeýshiligimen jaryq kórgen úsh myń kitaptyń bir bóligi aýyldyq mektepterge tegin jetkizilse, qalǵany kitap dúkenderinde satylymǵa shyǵarylady.
Bul joba qazaq jastarynyń álemdik oi qazynasyna erkin boilap, bilim men damýdyń jańa belesterin baǵyndyrýyna jol ashary sózsiz.
